குற்றச்சாட்டுக்கள் மற்றும் அவதூறுகளிலிருந்து அரசாங்கத்தைப் பாதுகாக்குமாறு அரசாங்க ஊழியர்களை வலியுறுத்தியதற்காகப் பிரதம மந்திரி இஸ்மாயில் சப்ரி யாகோப்பை பக்காத்தான் ஹராப்பான் இளைஞர்கள் விமர்சித்தனர்.

இன்று ஒரு அறிக்கையில், இது அரசாங்கத் தலைவரிடமிருந்து வரும் ஒரு “இயற்கைக்கு மாறான” நடத்தை, எனவே, அரசு ஊழியர்களால் நிராகரிக்கப்பட வேண்டும் என்று ஹராப்பான் கூறியது.

“இஸ்மாயில் சப்ரியின் அழைப்புக்கள் மக்கள் மத்தியில் கூட்டணியின் தோற்றத்தை மேம்படுத்துவதற்காக அரசாங்க ஊழியர்களை “பிரச்சார கருவிகளாக” தவறாகப் பயன்படுத்தும் BN அரசாங்கத்தின் கடந்தகால அணுகுமுறையை மீண்டும் மீண்டும் செய்யக்கூடும் என்று அஞ்சப்படுகிறது”.

“பெல்டா, ரிஸ்டா மற்றும் கெமாஸ் போன்ற ஏஜென்சிகளை நடத்துவதால் அரசு ஊழியர்கள் மக்களுக்கு நெருக்கமானவர்கள் என்பதை நினைவில் கொள்ளுங்கள்,” என்று அவர்கள் கூறினர்.

மூன்று நாட்களுக்கு முன்பு, இஸ்மாயில் சப்ரி தனது நிர்வாகம் தோல்வியடைந்துவிட்டது என்ற குற்றச்சாட்டு மற்றும் அவதூறுகளுக்கு எதிராக அரசாங்கத்தைப் பாதுகாக்குமாறு அரசாங்க ஊழியர்களிடம் கூறியதாகக் கூறப்படுகிறது

பிரதமரின் துறை (JPM) ஊழியர்களுடனான ஒரு சந்திப்பில், இஸ்மாயில் சப்ரி, அரசு ஊழியர்கள் அவரை அரசாங்கத்தின் தலைவராகப் பார்ப்பதன் மூலம் அரசாங்கத்தைப் பாதுகாக்க வேண்டும், ஒரு அரசியல் கட்சித் தலைவராக அல்ல என்று கூறினார்.

“நீங்கள் பாதுகாக்கும்போது, ​​அரசியல் செய்யாதீர்கள், என்னை அரசியல் தலைவராகப் பார்க்காமல், அரசாங்கத்தின் தலைவராகவும், நீங்கள் அரசாங்கத்தில் உறுப்பினராகவும் இருக்கிறீர்கள்”.

“இந்த அரசாங்கம் ஒரு கூட்டு அரசாங்கம். அதனால்தான் நான் மலேசிய குடும்பக் கருத்தை அறிமுகப்படுத்தினேன், ஏனெனில் இந்த அரசாங்கத்தை நாங்கள் ஒரே குடும்பமாக நினைக்க வேண்டும்,” என்று பெரா எம்.பி கூறியதாகக் கூறப்படுகிறது.

அந்தக் குறிப்பில், அரசாங்கத்தை ஆதரிப்பதை நோக்கமாகக் கொண்ட ஒரு “ட்ரோல் பண்ணை”யுடன் போலீசாரை இணைத்த மெட்டாவின்(Meta’s) கண்டுபிடிப்புகளை இஸ்மாயில் சப்ரிக்கு ஹராப்பான் நினைவூட்டியது.

“அவர் பிஎன் அரசாங்கத்தைப் பாதுகாக்க அரசு ஊழியர்களுக்கு அழைப்பு விடுக்கும்போது, ​​மெட்டாவின் அறிக்கை சரியாக இருக்கும் என்பதை மக்கள் பார்ப்பார்கள்,” என்று அவர்கள் மேலும் தெரிவித்தனர்.

அரசு ஊழியர்கள் அரசியலில் ஈடுபட தடை விதிக்கப்பட்டுள்ளது

குறுகிய கால ஹராப்பான் நிர்வாகத்தின்போது, 1993 ஆம் ஆண்டு பொது அதிகாரிகள் (நடத்தை மற்றும் ஒழுக்கம்) ஒழுங்குமுறைகளில் குறிப்பிட்டுள்ளபடி, நிர்வாக விவகாரங்களில் அரசு ஊழியர்கள் நடுநிலைமையை உறுதிப்படுத்த அரசியலில் ஈடுபடுவதைத் தடுக்கும் ஒரு ஒழுங்குமுறையை கூட்டணி மீண்டும் அமல்படுத்தியது என்பதை கவனத்தில் கொள்ள வேண்டும்.

ஹரப்பான் இளைஞர்கள் கூறுகையில், அரசு ஊழியர்கள் அரசியல் ரீதியாகச் செயல்படுவதைத் தடுக்கும் முந்தைய உத்தரவுபற்றிப் பிரதமர் அறிந்திருக்க வேண்டும் என்றார்.

“அவரது சமீபத்திய நடவடிக்கை அதிகார துஷ்பிரயோகத்திற்கு வழிவகுக்கும். BN அரசாங்கத்தைப் பாதுகாக்க அரசாங்க ஊழியர்களைக் கட்டாயப்படுத்தும் எந்தவொரு நடவடிக்கையும் நிராகரிக்கப்பட வேண்டும்”.

“தலைமை மாற்றம் ஏற்பட்டாலும் அரசுப் பணியைச் சீராக வழங்க அரசு ஊழியர்கள் நடுநிலைக் கொள்கையைக் கடைப்பிடிக்க வேண்டும்,” என்று ஹரப்பான் கூறியது.