இன்று நடைபெற்ற கூட்டத்தைத் தொடர்ந்து நெகிழ்வான வேலை நேரங்களை (Waktu Bekerja Berlainan or WBB) நடைமுறைப்படுத்துவதற்கான முன்னோடித் திட்டத்தை ரத்து செய்ய அமைச்சரவை முடிவு செய்துள்ளது.

இந்தத் தீர்மானம் இந்தத் திட்டத்தைப் பற்றி இன்னும் ஆழமான மற்றும் விரிவான ஆய்வுக்கு வழி வகுக்கும் என்று சுகாதார அமைச்சர் சுல்கெப்ளி அஹ்மட் கூறினார்.

முன்னாள் சுகாதார இயக்குநர் ஜெனரல் அபுபக்கர் சுலைமான் தலைமையில் இந்த முழுமையான மதிப்பாய்வை நடத்துவதற்காகத் தனது அமைச்சகம் ஒரு சிறப்புக் குழுவை அமைக்கும் என்றார்.

“சுகாதார சேவைகளை வழங்குவதை மேம்படுத்துவதிலும், பணியாளர்கள் திட்டமிடலை திறம்பட நிவர்த்தி செய்வதிலும் குழு கவனம் செலுத்தும்”.

“அனைவருக்கும், குறிப்பாகச் சுகாதாரப் பணியாளர்களுக்குப் பாதுகாப்பான மற்றும் நியாயமான பணிச்சூழலை உருவாக்க நாங்கள் உறுதிபூண்டுள்ளோம்,” என்று சுல்கெப்ளி கூறினார்.

சுகாதார அமைச்சர் சுல்கெப்ளி அஹ்மட்

சுகாதார அமைச்சின் WBB ஷிப்ட் சிஸ்டம் முதலில் பிப்ரவரி 1 முதல் ஏழு மருத்துவமனைகளில் இயங்கத் திட்டமிடப்பட்டது. இருப்பினும், இந்தத் திட்டம் சுகாதாரப் பணியாளர்களிடையே குறிப்பிடத் தக்க கவலைகளை எழுப்பியது.

வேலை நேரத்தைக் குறைத்தல் மற்றும் நிலைமைகளை மேம்படுத்துதல் ஆகியவற்றை இலக்காகக் கொண்டாலும், மலேசிய மருத்துவ சங்கம் போன்ற சில பகுதிகள் அதைச் செயல்படுத்துவது ஏற்கனவே நீட்டிக்கப்பட்ட பொது சுகாதார அமைப்புக்கு மேலும் சுமையை ஏற்படுத்தும் என்று வாதிட்டது.