பதவி விலகும் தலைமை நீதிபதி தெங்கு மைமுன் துவான் மாட், தனது பதவிக்காலம் நீட்டிக்கப்படாவிட்டால் அது ஒரு பிரச்சினை அல்ல என்றார்.

தனது பதவிக் காலத்தின் கடைசி நாளில், தலைமை நீதிபதியாகத் தனது ஆறு ஆண்டுகால சேவைக்காக எந்த வருத்தமும் இல்லை என்று அவர் கூறினார்.

“நான் கூறக்கூடியது என்னவென்றால், நான் ஆறாண்டுகள், 2019 மே 2 முதல் 2025 ஜூலை 1 வரை, நல்ல உடல்நலத்துடன் பணியாற்றியிருக்கிறேன்… அதுவே ஒரு ஆசீர்வாதம் என நான் உணருகிறேன்.”

“எனது பணிக்காலத்தை முடித்துவிட்டதால் எந்த வருத்தமும் இல்லை. எனக்கு இன்னும் ஆறு மாதங்களுக்குப் பணி நீட்டிப்பு வழங்கப்படவில்லை என்பது ஒரு பிரச்சினையே அல்ல. நிச்சயமாக ஒரு பிரச்சினையே அல்ல”.

“ஆறு ஆண்டுகளுடன் ஒப்பிடும்போது ஆறு மாதங்கள் அவ்வளவு குறிப்பிடத்தக்கவை அல்ல,” என்று கோஸ்மோ இன்று புத்ராஜெயாவில் உள்ள நீதி அரண்மனையில் அவர் கூறியதாக மேற்கோள் காட்டியது.

நீதித்துறையின் மீதான பொதுமக்களின் நம்பிக்கையை மீட்டெடுக்கும் மரபைத் தனது வாரிசு – மற்றும் பிற அனைத்து நீதிபதிகளும் தொடர்வார்கள் என்றும் அவர் நம்பிக்கை தெரிவித்தார்.

மத்திய அரசியலமைப்பின் அனுமதியின்படியும், பல்வேறு தரப்பினரால் வலியுறுத்தப்பட்டபடியும், தெங்கு மைமுன் தனது பதவிக்காலத்தை ஆறு மாதங்களுக்கு நீட்டிக்காவிட்டால், நாளைத் தனது 66வது பிறந்தநாளில் கட்டாய ஓய்வு பெறுவார்.

நீதித்துறை காலியிடங்கள்

இன்று அதிகாலையில், தெங்கு மைமுனின் சேவை நீட்டிப்புக்கு டிஏபி தனது ஆதரவை அறிவித்தது, அதே நேரத்தில் நீதித்துறை காலியிடங்களைப் பற்றி விவாதிக்க ஒரு அசாதாரண பொதுக் கூட்டத்திற்கு வழக்கறிஞர் மன்றம் அழைப்பு விடுத்தது.

இருப்பினும், தெங்கு மைமுனின் பதவிக்காலத்தை நீட்டிக்க அரசாங்கத்தை வற்புறுத்துவதற்கான முயற்சிகள்குறித்து பிரதமர் அன்வார் இப்ராஹிம் நேற்று கடுமையாகச் சாடினார்.

இந்த நடவடிக்கையை நீதித்துறையை அரசியலாக்கும் முயற்சி என்று அவர் அழைத்தார், அத்தகைய சுதந்திரமான நிறுவனத்தில் இது நடக்கக் கூடாது என்று வலியுறுத்தினார்.

தெங்கு மைமூனைத் தவிர, மேல்முறையீட்டு நீதிமன்றத் தலைவர் அபாங் இஸ்கந்தர் அபாங் ஹாஷிமும் நாளை ஓய்வு பெற உள்ளார்.

சபா மற்றும் சரவாக்கின் தலைமை நீதிபதி அப்துல் ரஹ்மான் செப்லி மற்றும் பெடரல் நீதிமன்ற நீதிபதிகள் நல்லினி பத்மநாதன், ஜபரியா யூசோப் மற்றும் ஹனிபா ஃபரிகுல்லா உள்ளிட்ட மூத்த நீதித்துறை பிரமுகர்கள் வரும் மாதங்களில் ஓய்வு பெறுவார்கள்.

அப்துல் ரஹ்மான், ஜபாரியா மற்றும் ஹனிபா ஆகியோரின் பதவிக்காலம் ஏற்கனவே ஆறு மாதங்களுக்கு நீட்டிக்கப்பட்டுள்ளது.