2026-ஆம் ஆண்டின் உலகப் பத்திரிகை சுதந்திரக் குறியீட்டில் (World Press Freedom) மலேசியாவின் தரம் சரிந்துள்ள நிலையில், உள்ளூர் ஊடகங்கள் மற்றும் பத்திரிகையாளர்களின் நிலைமை மோசமடைந்து வருவதாகக் கூறி சமூக ஆர்வலர்களும் அரசாங்க விமர்சகர்களும் தங்களது கவலையை வெளிப்படுத்தியுள்ளனர்.

காசா, பாலஸ்தீனம், சூடான் மற்றும் பிலிப்பைன்ஸ் ஆகிய நாடுகளில் முன்னெப்போதும் இல்லாத எண்ணிக்கையில் பத்திரிகையாளர்கள் கொல்லப்பட்டதற்கும், பிரதான ஊடகங்கள் மீதான குறிப்பிடத்தக்க நம்பிக்கை குறைபாட்டிற்கும் மத்தியிலேயே இந்த ஆண்டு தரவரிசை வெளியிடப்பட்டதாக மலேசிய சுதந்திர ஊடக மையம் (CIJ) குறிப்பிட்டுள்ளது.

“எனவே, மலேசியாவின் வீழ்ச்சி என்பது வெறும் அடையாள வீழ்ச்சி மட்டுமல்ல, உலக அளவிலும் நாட்டிலும் பத்திரிகை சுதந்திரத்திற்கு நிலவும் உண்மையான மற்றும் மோசமடைந்து வரும் சூழலையே இது பிரதிபலிக்கிறது,” என்று CIJ நிர்வாக இயக்குனர் வாட்சலா நாயுடு கூறினார்.

எல்லைகளற்ற செய்தியாளர்கள் (RSF) அமைப்பால் வெளியிடப்பட்ட இந்தக் குறியீட்டில், மலேசியா இந்த ஆண்டு ஏழு இடங்கள் சரிந்து 95-வது இடத்தைப் பிடித்துள்ளது. அதன் ஒட்டுமொத்த மதிப்பெண் கடந்த ஆண்டின் 56.09-லிருந்து 52.73-ஆகக் குறைந்துள்ளது.

மதிப்பிடப்பட்ட ஐந்து குறிகாட்டிகளிலும் இந்த வீழ்ச்சி பிரதிபலித்தது. குறிப்பாக சமூகக் கட்டுப்பாடுகள் மற்றும் சுய-தணிக்கையை மதிப்பீடு செய்யும் சமூக-கலாச்சாரக் குறிகாட்டியில் மிகப்பெரிய சரிவு பதிவாகியுள்ளது.

“மலேசிய ஊடக கவுன்சில் சட்டம் 2025 அமலுக்கு வந்திருப்பது, சுதந்திரமான மற்றும் சுயாதீனமான ஊடகத்தை ஊக்குவிப்பதற்கான அரசாங்கத்தின் உறுதிப்பாட்டை வெளிப்படுத்தும் ஒரு வாய்ப்பாக இருந்திருக்க வேண்டும் என்பதால் இது மிகவும் மனவேதனை அளிக்கிறது,” என்று வாத்ஷ்லா (மேல்) ஒரு அறிக்கையில் தெரிவித்தார்.

ஊடகப் பேரவை ஒரு சுய-கட்டுப்பாட்டு அமைப்பாக உருவாக்கப்பட்ட போதிலும், ஊடக சுதந்திரத்தைக் கட்டுப்படுத்த “ஆயுதமாகப்” பயன்படுத்தக்கூடிய பல “கொடூரமான” சட்டங்களை அரசாங்கம் தொடர்ந்து தன்வசம் வைத்துள்ளதாக அவர் சுட்டிக்காட்டினார்.

சீர்திருத்தங்களில் முரண்பாடு

இதற்கிடையில், மலேசியாவின் தரவரிசை அர்த்தமுள்ள ஊடகச் சீர்திருத்தத்தை வழங்கத் தவறிய அரசாங்கத்தின் தோல்வியைப் பிரதிபலிக்கிறது என்றும், பத்திரிகை சுதந்திரம் குறித்த அதன் உறுதிப்பாடு அதிகளவில் கேள்விக்குள்ளாக்கப்படுவதாகவும் தாசேக் குளுகோர் நாடாளுமன்ற உறுப்பினர் வான் சைபுல் வான் ஜான் கூறினார்.

சமீபத்திய ஆண்டுகளில் மலேசியாவின் சீரற்ற தரவரிசையையும் அவர் சுட்டிக்காட்டினார் – 2023-இல் 73-வது இடம், 2024-இல் 107-வது இடத்திற்கு வீழ்ச்சி, 2025-இல் 88-வது இடத்திற்கு உயர்வு, இப்போது மீண்டும் வீழ்ச்சி – இது சீர்திருத்த முயற்சிகளில் நிலைத்தன்மை இல்லை என்பதற்குச் சான்றாகும்.

“முன்வைக்கப்படும் சீர்திருத்தங்கள் ஆழமாக வேரூன்றவில்லை என்பதையும், அவை தொடர்ச்சியாகச் செயல்படுத்தப்படத் தவறிவிட்டன என்பதையும் இது காட்டுகிறது,” என்று முன்னாள் பெர்சத்து தலைவர் தனது அறிக்கையில் தெரிவித்தார்.

1948-ஆம் ஆண்டு தேசநிந்தனைச் சட்டத்தை ரத்து செய்வதாக அளித்த வாக்குறுதியை நிறைவேற்றத் தவறியதற்காக அரசாங்கத்தை விமர்சித்த வான் சைபுல், விமர்சகர்களுக்கு எதிராக இந்தச் சட்டத்தைத் தொடர்ந்து பயன்படுத்துவது ஒரு அச்சமான சூழலை உருவாக்கியுள்ளதுடன் கருத்துச் சுதந்திரத்தையும் கட்டுப்படுத்தியுள்ளது என்றார்.

ஊடக சுதந்திரத்தை நலிவடையச் செய்வது ஜனநாயகத்தின் தணிக்கை மற்றும் சமநிலையை (checks and balances) சீர்குலைக்கும் என்றும், பொது விவாதத்திற்கான வெளியைக் குறைத்து, இறுதியில் தேசிய நிறுவனங்கள் மீதான நம்பிக்கையை சிதைக்கும் என்றும் அவர் எச்சரித்தார்.

“பொருளாதாரக் கண்ணோட்டத்தில், ஊடகச் சுதந்திரம் என்பது வெளிப்படைத்தன்மை மற்றும் நிர்வாகத்துடன் நெருங்கிய தொடர்புடையது,” என்று அவர் கூறினார். மேலும், கட்டுப்பாடுகள் விதிக்கப்படுவது வெளிப்படைத்தன்மை குறைவு மற்றும் கொள்கை மாற்றங்களை முன்கூட்டியே கணிக்க முடியாத நிலை போன்ற எண்ணத்தை உருவாக்குவதால், அது முதலீட்டாளர்களின் நம்பிக்கையைப் பாதிக்கக்கூடும் என்றும் அவர் குறிப்பிட்டார்.

“ஊடக சுதந்திரம் அரசாங்கத்திற்கு ஒரு அச்சுறுத்தல் அல்ல, மாறாக பொறுப்புக்கூறல் மற்றும் பொது நம்பிக்கையின் அடித்தளம்,” என்று வான் சைபுல் வலியுறுத்தினார்.

ஆசியான் (ASEAN) நாடுகளுக்கு இடையே, மலேசியா மூன்றாவது இடத்தைப் பிடித்துள்ளது. இதில் திமோர்-லெஸ்தே(Timor-Leste) 30-வது இடத்திலும், தாய்லாந்து 92-வது இடத்திலும் முறையே முதல் இரண்டு இடங்களில் உள்ளன.

WPF குறியீடு 180 நாடுகளில் பத்திரிகையாளர்கள் மற்றும் ஊடகங்கள் அனுபவிக்கும் சுதந்திரத்தின் அளவை வைத்து வரிசைப்படுத்துகிறது.