பேராக், தப்பாவிற்கு  அருகே அண்மையில் மலையேறிய ஒருவர் இரண்டு வாரங்களாகக் காணாமல் போனதைத் தொடர்ந்து எழுந்த பாதுகாப்பு கவலைகள் காரணமாக, ஜூலை 1 முதல் அனைத்து நிரந்தர வனக்காப்பகங்களிலும் சில குறிப்பிட்ட மலையேற்ற நடவடிக்கைகளுக்கான விண்ணப்பங்களை சிலாங்கூர் தற்காலிகமாக நிறுத்தி வைக்கும்.

இன்று வெளியிட்டுள்ள அறிவிப்பில், சிலாங்கூர் வனத்துறை மறுஅறிவிப்பு வரும் வரை “டிரான்ஸ் ஹைக்கிங்” (நீண்ட தூர மலையேற்றம்) மற்றும் “கம்ப்ரெஸ் ஹைக்கிங்” (அதிவேக மலையேற்றம்) நடவடிக்கைகளுக்கான புதிய விண்ணப்பங்களைச் பரிசீலிக்காது என்று தெரிவித்துள்ளது.

மேலும், பொதுமக்கள் இந்த உத்தரவுக்குக் கீழ்ப்படிய வேண்டும் என்று நினைவூட்டியுள்ள வனத்துறை, விதிகளை மீறுவோருக்கு மாநில வனச் சட்டங்களின் கீழ் ஐந்து ஆண்டுகள் வரையிலான சிறைத்தண்டனை, RM30,000 வரை அபராதம் அல்லது இவை இரண்டும் விதிக்கப்படலாம் என எச்சரித்துள்ளது.

பல ஆபத்தான மலையேற்றப் பாதைகளில் “கம்ப்ரெஸ் ஹைக்கிங்” நடவடிக்கைகளுக்குத் தடை விதித்த பேராக் வனத்துறையின் இதேபோன்ற முடிவைத் தொடர்ந்து இந்த நடவடிக்கை எடுக்கப்பட்டுள்ளது.

“டிரான்ஸ் ஹைக்கிங்” என்பது ஒரு வனக்காப்பகம் அல்லது மலைத்தொடரைக் கடந்து செல்லும் நீண்ட தூர, ஒரு புள்ளியிலிருந்து மற்றொரு புள்ளிக்குச் செல்லும் மலையேற்றத்தைக் குறிக்கிறது; அதேவேளையில், “ஹைக்கிங் கம்ப்ரெஸ்” என்பது அதிவேகமான அல்லது நேரத்தைக் குறைத்துச் செய்யப்படும் மலையேற்றத்தைக் குறிக்கிறது.

மே 24 அன்று தப்பாவில் உள்ள குனுங் பத்து பூத்தேவில் ‘டிரான்ஸ் ஸ்பென்சர் சேப்மேன்’ மலையேற்றத்தின் போது ஜாஸ்லிண்டா சாலுடின் என்ற மலையேறுபவர் காணாமல் போனார்.

அவர் அதற்கு முந்தைய நாள் மேலும் 13 மலையேறுபவர்கள் மற்றும் இரண்டு மலை வழிகாட்டிகளுடன் தனது பயணத்தைத் தொடங்கியதாகவும், பின்னர் உடல்நலக் குறைவு ஏற்பட்டதால் மற்றொரு மலையேறுபவருடன் நின்றதாகவும் தெரிவிக்கப்பட்டது.

தப்பாவின் மலைப் பகுதியில் உள்ள போஸ் முசோவில் உள்ள கம்பங் லுபுக் கஹாருவுக்கு அருகே ஜூன் 6 அன்று ஓர் அஸ்லி கிராமவாசி ஒருவரால் அவர் பாதுகாப்பாகக் கண்டறியப்பட்டார்.

 

 

-fmt