ஆகஸ்ட்  9-இல்  பிரதமர்  நஜிப்  அப்துல்  ரசாக்  பாசிர்  கூடாங்கில்  அத்தொகுதி  அம்னோ  பேராளர்  கூட்டத்தைத் தொடக்கிவைத்து  உரையாற்றினார்.  ஆகஸ்ட்  29-இல்,  அதே  பாசிர்  கூடாங்கில்  நஜிப்பின்  அரசியல்  குருவும்  அவரைக்  கடுமையாகக்  குறைகூறிவருபவருமான  டாக்டர்  மகாதிர்  முகம்மட்  உரையாற்ற  விருக்கிறார்.

மகாதிர் அங்கு  Malaysia Hari Ni, Ke Mana Kita? (மலேசியா  இன்று: எங்கு  சென்று  கொண்டிருக்கிறோம்?).  என்ற  தலைப்பில்  உரையாற்றுவார். யயாசான்  பெர்குருவான்  இல்மு-வும்  ச்சே  டெட்  மன்றமும்  இந் நிகழ்வுக்கு  ஏற்பாடு  செய்துள்ளன.

பாசிர்  கூடாங்  உள்ளரங்கில்  பிற்பகல்  மணி  2-க்கு  மகாதிரின்  சொற்பொழிவு  தொடங்கும்  என  யயாசான்  பெர்குருவான்  இல்மு  இயக்குனர்  அப்துல்  ரஹ்மான்  முகம்மட்  ஷரிப்  மலேசியாகினியிடம்  தெரிவித்தார்.

“அனுமதி  இலவசம். கிளப்  ச்சே  டெட்டுடன்  சேர்ந்து  ஏற்பாடு  செய்துள்ளோம்”, என்றாரவர்.

நஜிப், பாசிர் கூடாங்  அம்னோ  ஆண்டுக்கூட்டத்தில்  ஒரு  அழையா  விருந்தாளியாகத்தான்  கலந்துகொண்டார். சிங்கப்பூரின்  தேசிய நாள்  கொண்டாட்டத்தில்  கலந்துகொள்ளச்  சென்றிருந்த  அவர்  அப்படியே  நேரத்தை  ஒதுக்கிக்கொண்டு  பாசிர்  கூடாங்  கூட்டத்துக்குச்  சென்றார். இதை  அத்தொகுதித்  தலைவரும்  ஜோகூர்  மந்திரி  புசாருமான  காலிட்  நோர்டின்  தம்  உரையில்  குறிப்பாக  எடுத்துரைத்தார்.

“இவ்வாண்டு  தொகுதிக்  கூட்டம்  பேறு  பெற்றது. ஏனென்றால்,  கட்சித்  தலைவரே  தொடக்கி  வைக்கப்  போகிறார்.. தொகுதி  அழைக்காமல்  தலைவரே  தொடக்கிவைக்க  முன்வந்துள்ளார்”, என  காலிட்  கூறினார்.

நஜிப்பின் ஜோகூர்  வருகைக்கு  உற்சாகமான  வரவேற்பு  கிடைத்தததாகக்  கூற  முடியாது. அவர் ஜூலை  27-இல்  முகைதின்  யாசினைத்  துணைப்  பிரதமர்  பதவியிலிருந்து  வெளியேற்றியிருந்தது  இதற்குக்  காரணமாக  இருக்கலாம்.

இந்நிலையில்தான்  மகாதிரின்  பாசிர்  கூடாங்  வருகை  ஒரு  பரபரப்பை  ஏற்படுத்தியுள்ளது.  மகாதிருக்கு பாசிர்  கூடாங்  மக்கள் எப்படிப்பட்ட  வரவேற்பைக்  கொடுப்பார்கள், எப்படிப்பட்ட  கூட்டம்  கூடும், நஜிப்புக்குக் கூடியதைவிட  பெரிய  கூட்டம்  கூடுமா  என்றெல்லாம்  உன்னிப்பாகக்  கவனிக்கப்படும்.