2013 பினாங்கில்  சீனப்  புத்தாண்டுப்  பொது  உபசரிப்பில் கொரியன்  சூப்பர்ஸ்டார்  Psy நிகழ்ச்சி  நடத்துவதற்கு  பிஎன்  1எம்டிபி  பணத்தைப்  பயன்படுத்தியதா? இதைப்  பொதுக்  கணக்குக்குழு(பிஏசி)  கண்டறிய  வேண்டும்.

இக்கேள்விக்கு  இந்நாள்வரை  பதில்  கிடைக்கவில்லை  என  டிஏபி  நாடாளுமன்றத்  தலைவர்  லிம்  கிட்  சியாங்  கூறினார்.

“பிஏசி  இன்று  அல்லது  நாளை  அதன்  விசாரணையை  முடித்துக்கொள்ளும்  என்று  அதன்  தலைவர்  ஹசான்  அரிபின்   அறிவித்திருப்பதால் ஒருவேளை,  இக்கேள்விக்கு  அது விடையைக்  கண்டுபிடிக்கக்  கூடும்”, என  லிம்  இன்று  ஓர்  அறிக்கையில்  கூறினார்.

Psy நிகழ்ச்சி  மூலம்  பினாங்கு  மக்களின்  ஆதரவைப்  பெறலாம்  என  பிஎன்  நினைத்தது. ஆனால், அது  நடக்கவில்லை.

அந்நிகழ்ச்சியின்போது  பிரதமர்  நஜிப்  அப்துல்  ரசாக்  கூட்டத்தினரை  நோக்கி “Psy-யை  வரவேற்க  நீங்கள்  தயாரா?”  என்று  வினவினார்.  கூட்டத்தினர் “ஆமாம்”  என்று  குரல்  எழுப்பினர்.

அதன்பின்  அவர்  “பிஎன்னை  வரவேற்கத்  தயாரா?”, என்று  கேட்டதற்குக்  கூட்டத்தின்  பின்வரிசையில்  இருந்தவர்கள்  “இல்லை”  என்று  சிரித்துக்கொண்டே  கூவினார்கள்.