மலாக்கா மாநிலத் தேர்தல் பிரச்சாரத்தின்போது ஒற்றுமை அரசாங்கத்தை விமர்சித்த அமைச்சரவை அமைச்சர்கள், நாளை நடைபெறும் அமைச்சரவைக் கூட்டத்தில் தங்களது குறைகளை எழுப்புமாறு பிரதமர் அன்வார் இப்ராஹிம் சவால் விடுத்துள்ளார்.

அரசாங்கத்தில் இருக்கும் எனது நண்பர்கள் பிரச்சாரம் செய்து வருகிறார்கள். அவர்கள் அரசாங்கத்தைத் தாக்குகிறார்கள், ஆனால் அரசாங்கத்தில் ஒரு துணைப் பிரதமரையும் இதர அமைச்சர்களையும் கொண்டுள்ளனர், என்று அவர் கூறினார்.

நீங்கள் ஏதேனும் ஒன்றில் உடன்பட்டாலும் சரி, உடன்படவில்லை என்றாலும் சரி, அதை நமது அமைச்சரவைக் கூட்டத்தில் எழுப்ப வேண்டும். நாம் நாளை காலை 9 மணி முதல் மதியம் வரை கூடுகிறோம். மூன்று மணி நேரம். உங்கள் கருத்தைப் பேசுங்கள். இதுதான் புதிய அரசியல், என்று அவர் இன்று இரவு தேவான் பே போங்கில் நடைபெற்ற ‘மலாம் ஹரப்பான்’ நிகழ்வில் பேசும்போது கூறினார்.

பக்காத்தான் ஹரப்பான் தலைவருமான அன்வார், நவம்பர் 14 அன்று நடைபெறவுள்ள மாநிலத் தேர்தல் பிரச்சாரத்திற்காக மலாக்காவிற்கு வந்துள்ளார்.

தனது உரையில் அன்வார் குறிப்பிட்ட அந்த விமர்சகர்கள் யார் என்பது இன்னும் அறியப்படவில்லை.

இருப்பினும், கடந்த ஆகஸ்ட் மாதம் நடைபெற்ற நெகிரி செம்பிலான் மாநிலத் தேர்தல் பிரச்சாரத்தின் போது, ஒற்றுமை அரசாங்கத்தின் கூட்டணிக் கட்சிகளை விமர்சிப்பதற்காகத் தங்களது பதவிகளைப் பயன்படுத்திய கூட்டாட்சிப் பொறுப்பாளர்களைய் அவர் இதற்கு முன்பு கண்டித்திருந்தார்.

பாரிசான் நேஷனல் தலைவருமான அவரது துணைப் பிரதமர் அஹ்மத் ஜாஹித் ஹமிதி, அன்வாருக்கு அவர்கள் மீது அதிருப்தி இருந்தால் பிஎன் அமைச்சர்களைப் பதவியிலிருந்து நீக்கலாம் என்று அப்போது பதிலளித்திருந்தார்.

நவம்பர் 14 அன்று நடைபெறும் தேர்தல்களில், பக்காத்தான் ஹரப்பானும் பாரிசான் நேஷனலும் கூட்டாட்சி அளவில் கூட்டாளிகளாக இருந்தபோதிலும், இணைந்து செயல்படவில்லை. மாறாக, பிஎன் கூட்டணி பெரிகாத்தான் நேஷனலுடன் ஒரு தேர்தல் ஒப்பந்தத்தைக் கொண்டுள்ளது.

 

 

 

-fmt