நவம்பர் 14 அன்று நடைபெறவுள்ள மலாக்கா மாநிலத் தேர்தலில், பாக்காத்தான் ஹரப்பான் (Pakatan Harapan) கூட்டணியின் பல்லினப் பிரதிநிதித்துவம் மற்றும் வேட்பாளர்களின் நேர்மை ஆகியவற்றைச் சுட்டிக்காட்டி, அக்கூட்டணிக்கு ஆதரவளிக்குமாறு பிரதமர் அன்வார் இப்ராஹிம் வாக்காளர்களைக் கேட்டுக்கொண்டுள்ளார்.

பிரச்சாரத்தில் இனவாத உணர்வுகள் சவாலாக உருவெடுத்துள்ள இந்தச் சூழ்நிலையில், மலாய், சீனர் மற்றும் இந்தியச் சமூகங்களின் கூட்டுப் பலத்தைப் பயன்படுத்த இக்கூட்டணி முயல்வதாக அவர் கூறினார்.

பிரச்சார காலம் முழுவதிலும் கட்சிகள் இன மற்றும் மதத் தூண்டுதல்களை நிராகரிக்க வேண்டும் என்றும், அதற்குப் பதிலாகக் கொள்கைகள், சேவைப் பதிவுகள் மற்றும் மக்கள் நலன் ஆகியவற்றிலேயே கூட்டணி கவனம் செலுத்தும் என்றும் ஹரப்பான் பொதுச்செயலாளர் சைபுடீன் நசுத்தியோன் இஸ்மாயில் அழைப்பு விடுத்ததைத் தொடர்ந்து அன்வாரின் இந்தக் கருத்துகள் வெளியாகியுள்ளன.

அக்டோபர் 31 ஆம் தேதி வேட்புமனுத் தாக்கலைத் தொடர்ந்து, 16-வது மலாக்கா மாநிலத் தேர்தல் பிரச்சாரம் அதிகாரப்பூர்வமாகத் தொடங்கிய நிலையில் சைபுடீன் இந்தக் கோரிக்கையை முன்வைத்தார்.

முந்தைய 2021 மாநிலத் தேர்தலில் பாரிசான் நேஷனல் 21 இடங்களையும், பெரிக்காத்தான் நேஷனல் 2 இடங்களையும் கைப்பற்றிய நிலையில், ஹரப்பான் 28 இடங்களில் 5 இடங்களை மட்டுமே வென்றிருந்தது என்பது குறிப்பிடத்தக்கது.

ஹரப்பான் தலைவருமான அன்வார் இன்று ‘எக்ஸ்’ (X) சமூகவலைதளப் பதிவில், “கடின உழைப்பு, நேர்மையான தலைமைத்துவம் மற்றும் மக்களின் நலன்களைப் பாதுகாத்து மாநிலத்தை மேம்படுத்திய நிரூபிக்கப்பட்ட வரலாறு” ஆகியவற்றைக் குறிப்பிட்டு, கூட்டணி மீது நம்பிக்கை வைக்குமாறு வாக்காளர்களைக் கேட்டுக்கொண்டார்.

வாக்காளர்கள் தங்களின் தேர்வை விவேகத்துடன் மேற்கொள்வார்கள் என்றும், மாநிலத்திற்குத் தொடர்ந்து சேவை செய்ய ஹரப்பானுக்கு வாய்ப்பு அளிக்கப்படும் என்றும் அவர் நம்பிக்கை தெரிவித்தார்.

“நீங்கள் முடிவு எடுக்கும்போது எல்லாம் வல்ல அல்லாஹ் உங்கள் இதயங்களை ஒளிரச் செய்யட்டும்; ஹரப்பான் தனது சிறந்த திறமையுடன் சேவை செய்வதற்கான வலிமையை வழங்கட்டும்,” என்றும் அவர் குறிப்பிட்டார்.

நவம்பர் 14 அன்று நடைபெறும் தேர்தலில் 28 மாநிலச் சட்டமன்றத் தொகுதிகளுக்கு 79 வேட்பாளர்கள் போட்டியிடுகின்றனர். இதில் ஹரப்பான் கூட்டணி 24 வேட்பாளர்களைக் களமிறக்கியுள்ளது.