சரவாக் மாநிலத்தின் 13ஆவது சட்டமன்றத் தேர்தலுக்கான வாக்குப்பதிவு டிசம்பர் 12ஆம் தேதி நடைபெறும் எனத் தேர்தல் ஆணையம் அறிவித்துள்ளது.

இன்று நடைபெற்ற செய்தியாளர் சந்திப்பில் பேசிய தேர்தல் ஆணையத் தலைவர் ரம்லான் ஹருன், வேட்புமனுத் தாக்கல் நவம்பர் 28ஆம் தேதியும், முன்கூட்டிய வாக்குப்பதிவு டிசம்பர் 8ஆம் தேதியும் நடைபெறும் என்று தெரிவித்தார்.

கடந்த அக்டோபர் 23ஆம் தேதி, சரவாக் ஆளுநர் வான் ஜுனைடி துவாங்கு ஜஃபாரின் ஒப்புதலைத் தொடர்ந்து, மாநிலச் சட்டமன்றம் அக்டோபர் 26ஆம் தேதி கலைக்கப்படும் என்று சரவாக் முதலமைச்சர் அபாங் ஜொஹாரி ஓபெங் அறிவித்திருந்தார்.

மேலும், தேர்தல் பணிகளை முன்னெடுப்பதற்காக 82 தேர்தல் அதிகாரிகளையும், 305 உதவித் தேர்தல் அதிகாரிகளையும் தேர்தல் ஆணையம் நியமித்துள்ளதாக ரம்லான் தெரிவித்தார்.

தேர்தல் பிரசார நடவடிக்கைகளைக் கண்காணிப்பதற்காக 82 தேர்தல் பிரசாரக் கண்காணிப்புக் குழுக்களும் அமைக்கப்படும் என்றும் அவர் கூறினார்.

எதிர்வரும் மாநிலத் தேர்தலில் இரண்டு மில்லியனுக்கும் அதிகமான பதிவு செய்யப்பட்ட வாக்காளர்கள் வாக்களிக்கத் தகுதி பெற்றுள்ளனர். மொத்தம் 82 சட்டமன்றத் தொகுதிகளில் போட்டி நடைபெறவுள்ளது.

கடந்த 2021ஆம் ஆண்டு டிசம்பர் 18ஆம் தேதி நடைபெற்ற மாநிலத் தேர்தலில், அபாங் ஜொஹாரி தலைமையிலான சரவாக் கட்சிகளின் கூட்டணி (GPS) 82 தொகுதிகளில் 76 இடங்களைக் கைப்பற்றியது. அதேவேளை, சரவாக் பெர்சத்து கட்சி (PSB) நான்கு இடங்களையும், ஜனநாயகச் செயல் கட்சி (DAP) இரண்டு இடங்களையும் வென்றிருந்தன.