அம்னோ இளைஞர் தலைவர் டாக்டர் அக்மல் சலேவை மறைமுகமாகத் தாக்கி, கட்சித் தலைவரும் துணைப் பிரதமருமான அஹ்மத் ஜாஹித் ஹமிடி, பொறுப்புக்கூறலைத் தவிர்ப்பதில் “குறுக்குவழிகளை எடுக்காமல்” விமர்சனங்களை ஏற்றுக்கொள்ளுமாறு அம்னோ இளைஞர் தலைவர்களுக்கு நினைவூட்டியுள்ளார்.
நியூ ஸ்ட்ரெய்ட்ஸ் டைம்ஸ் பத்திரிகையின்படி, மற்றவர்களை விமர்சிக்கும் அரசியல்வாதிகள் விமர்சனங்களை எதிர்கொள்ளத் தயாராக இருக்க வேண்டும் என்று ஜாஹிட் வலியுறுத்தினார், வெவ்வேறு கருத்துக்கள் அரசியலின் உள்ளார்ந்த பகுதியாகும் என்பதை எடுத்துக்காட்டினார்.
“நாம் மற்றவர்களை விமர்சித்தால், விமர்சனங்களை ஏற்றுக்கொள்ளத் தயாராக இருக்க வேண்டும். மற்றவர்கள் நம்முடன் உடன்படவில்லை என்பதற்காக அவர்கள் ஜனநாயக விரோதமானவர்கள் அல்லது யதார்த்தத்தை ஏற்றுக்கொள்ள முடியாதவர்கள் என்று நாம் குற்றம் சாட்டக் கூடாது”.
“மக்கள் எங்களுடன் உடன்படாதபோது, நாம் குறுக்குவழிகளைத் தேடக் கூடாது,” என்று அவர் இன்று புத்ராஜெயாவில் நடந்த ஒரு நிகழ்வில் செய்தியாளர்களிடம் கூறினார்.
அரசாங்கத்திலிருந்து அம்னோ வெளியேற வேண்டும் என்ற அக்மலின் அழைப்பை ஜாஹிட் நிராகரித்தபிறகு, “பதவி விலக” விரும்புவதாக அக்மலின் ரகசிய செய்திக்குப் பதிலளிக்கும் விதமாக இந்த அறிக்கை வெளிவந்ததாகத் தெரிகிறது.
சிறந்த முயற்சிகள் இருந்தபோதிலும், குறிப்பிடப்படாத ஒரு இலக்கை அடைய முடியவில்லை என்று மெர்லிமாவ் சட்டமன்ற உறுப்பினர் ஒரு முகநூல் பதிவில் சுட்டிக்காட்டினார்.
“நாங்கள் எங்களது முழு முயற்சியைச் செலுத்தி, சிறந்ததைக் கொடுத்துள்ளோம். ஒருவேளை இதில் ஏதேனும் குறைகள் இருந்தால், அது என்னால் ஏற்பட்டிருக்கலாம்.”
அவர் கூறியதாவது, “ஒருவேளை நான் பின்னோக்கிச் செல்லும் (பதவி விலகும்) நேரம் இதுவாக இருக்கலாம். இந்தப் போராட்டத்தை நேசிக்கும் அனைத்து நல் உள்ளங்களுக்கும் நன்றி. மதம், இனம் மற்றும் நாட்டிற்காக நமது நோக்கம் உண்மையாக இருந்தால், இறைவனின் அருளால் அதற்கான காலம் வரும் என நான் நம்புகிறேன்.”
இதற்குப் பதிலடி கொடுக்கும் வகையில், அக்மல் மீண்டும் தனது பேஸ்புக் பக்கத்தில், தான் தனது கொள்கைகளில் உறுதியாக இருப்பதாகத் தெரிவித்துள்ளார்.
