விக்னேஷ் புரொடக்ஷன்ஸ் என்ற பட நிறுவனம் சார்பாக பி.வேலுச்சாமி தயாரிக்கும் படம் “ஒரு ஊர்ல”. இந்த படத்தில் ‘பருத்திவீரன்’ வெங்கடேஷ் கதாநாயகனாக நடிக்கிறார். இவர் ‘பருத்திவீரன்’ படத்தில் பிரியாமணியின் முறை மாமன் வேடத்தில் நடித்தவர். கதாநாயகியாக நேகா பட்டீல் நடிக்கிறார். இவர் கன்னடப் படங்களில் கதாநாயகியாக நடித்துக் கொண்டிருப்பவர்.

மற்றும் இந்திரஜித், அன்னபூரணி, ’நான் கடவுள்’ முரளி, சுந்தர், சிவா, ஜப்பான் கண்ணன், முல்லை ஆடலரசு கோதண்டபாணி, மாதவி, வன ஜோதி, பேபி சௌந்தர்யா உள்பட பலர் நடித்துள்ளனர். இவர்களுடன் கதாப்பாதிரங்களுக்கேற்ப ஏராளமான கிராம மக்களும் இதில் நடிகர், நடிகைகளாக நடித்திருக்கிறார்கள்.

படத்திற்கு இளையராஜா இசையமைத்துள்ளார். மொத்தம் ஐந்து பாடல்கள். ஐந்து பாடல்களிலும் கிராமத்து மண்ணின் மணம் இருக்கும்.  இது இளையராஜா இசையில் வெளியாகும் 999 வது படம். பத்திரிகையாளர்களுக்கு அனுப்பியுள்ள செய்திகளிலும் இந்தப் படம் இளையராஜாவின 999வது படம் என்றே குறிப்பிட்டுள்ளார் தயாரிப்பாளர் வேலுச்சாமி. எனவே, பாலாவின் ‘தாரை தப்பட்டை’ படம்தான் இசைஞானி இசையமைக்கும் 1000-மாவது படம் என்பது உறுதியாகிவிட்டது.