1943, ஜுன் 2ம் தேதி, தேனி மாவட்டம், பண்ணைபுரத்தில் பிறந்தது இசை.. ஆம் இசை என்றாலும் இளையராஜா என்றாலும் ஒன்றுதானே.

1976ல் வெளிவந்த ”அன்னக்கிளி” படத்தின் மூலம் ஞானதேசிகனாக இருந்தவர் இளையராஜாவாக புது அவதாரம் எடுத்தார். அன்று யாரும் நினைத்திருக்க வாய்ப்பில்லை பின்நாளில் இவர் தமிழ் சினிமாவின் இசை ஜாம்பவனாக உருவெடுப்பார் என்று! கிராமத்து கீதங்களுக்கு புத்துயிர் கிடைக்கபெற்றது இவரின் இசையில் தான்.

இருக்க இடம், உண்ண உணவு, உடுத்த உடை, கேட்க இசைஞானியின் இசை இதுவே பல தமிழர்களின் வாழ்வின் அத்தியாவசிய தேவைகள்!

பூமிக்கு மட்டும் புவியீர்ப்பு விசை உள்ளதென்று யார் சொன்னது இவரின் இசைக்கும் உள்ளதென்று நியூட்டனும் புது கோட்பாட்டை எழுதியிருப்பார் அவர் நம் இசைஞானியின் இசையை ருசித்திருந்தால்.

ஒவ்வொரு சூழ்நிலைக்கும் எற்றார்போல் இசையமைத்தால் அவர் இசையமைப்பாளர். ஆனால் தன் இசையாலே ஒரு சூழ்நிலையை உருவாக்க முடியுமென்றால் அவர் தான் இசைஞானி!

தூர பயணங்களில் நம்மை தாலாட்டும் தாயாய், வேலை பளுவில் துணை நிற்கும் தோளாய், காதல் நேர மயக்கமாய், கொண்டாட்ட நேரங்களில் குதூகளமாய் இருப்பது இந்த ராகதேவனின் மெட்டுக்களே!

இது வரைக்கும் கிட்டதட்ட 5000 பாடல்களுக்கு மேல் இசையமைத்த இசைஞானி இளையராஜா உலக சினிமா வரலாற்றிலேயே யாரும் செய்திடாத இல்லை இல்லை செய்யமுடியாத சாதனையாக 1000த்திற்கும் மேற்பட்ட படங்களுக்கு இசையமைத்திருக்கிறார்.

பாலசுப்பிரமணியம், யேசுதாஸ், மலேசியா வாசுதேவன், ஜானகி, சித்ரா இன்னும் பல குரல் சக்ரவர்த்திகள், வைரங்களாய் மிளிர்ந்தது இவரின் இசையாலே என்று சொன்னால் அது மிகையாகது!

வசனங்கள் அற்ற காட்சிகளுக்கு உயிர் கொடுக்க உன்னை போன்ற ஒரு இசை பிரம்மா இன்றளவில் எங்கும் இல்லை.

இதுவரை உலகம் முழுவதுமிருந்து வந்த சிறந்த 10 பாடல்களில் இளையராஜா இசையமைத்த தளபதி படத்தில் இடம் பெற்ற பாடலான “ராக்கம்மா கையதட்டு” இடம்பெற்றதே இவரின் இசைக்கு எல்லை என்பதில்லை என்பதற்கு சான்று!

இசைஞானி லண்டனில் உல்ல Trinity College of Music ல் தங்கப்பதக்கம் வென்றவர், இவரின் சிறப்பான இசைக்கு 4 முறை தேசிய விருது பெற்றிருக்கிறார் என்பது குறிப்பிடதக்கது. இவர் புகழின் பின்னால் சென்றதில்லை அதனால் தான் புகழ் இவரை எப்போதும் பற்றிக்கொண்டது!

மிடாஸ் டச்சை நாங்கள் உணர்ந்ததில்லை ஆனால் இந்த மேஸ்ட்ரோவின் டச்சில் எப்போதுமே லயித்திருப்போம்! காலங்களை உறையவைக்கும் உன் உன்னத இசையால் என்றுமே எங்களை ஆட்சி செய்திடு! எத்தனை உறவுகள் இருந்தாலும் தாயைப்போல் ஆகுமா?

எத்தனை எத்தனை இசையமைப்பாளர்கள் வந்தாலும் அவர்கள் ராஜாவாக முடியுமா? ஒரு படத்தில் சொன்னதுபோல் ரேடியோவை கண்டுபிடித்தது மார்க்கோனி ! அதை கேட்க வைத்தது நம் இசைஞானி! ஏனென்றால் என்றுமே எங்கள் இளையராஜா தான் இசையின் ”ராஜா”!

வாழும் சகாப்தமான இசைஞானி இளையராஜாவின் பிறந்தநாளான இன்று இவரை வாழ்த்துவதில் பெரும் மகிழ்ச்சியடைகிறது சினிஉலகம்! இன்னும் இன்னும் உங்கள் இசையால் எங்கள் செவிகளுக்கு உயிர்கொடுத்துக்கொண்டே இருக்கவேண்டுமென்று தாழ்மையோடு கேட்கிறோம் இசைபிரம்மாவே!

-http://www.cineulagam.com