சிறந்த இசைக்கான தேசிய விருதை ஏன் இரண்டாகப் பிரித்துத் தருகிறீர்கள்? இது பாதி அங்கீகாரம் அளிப்பதற்கு சமம் என்று 5வது முறையாக தேசிய விருது பெற்ற இசையமைப்பாளர் இளையராஜா மத்திய அரசுக்கு கடிதம் எழுதியுள்ளார். தேசிய அளவில் 2015ம் ஆண்டுக்கான திரைப்பட விருதுகளில், தமிழ்த் திரையுலகுக்கு 5 விருதுகள் அறிவிக்கப்பட்டன. அவற்றில், சிறந்த பின்னணி இசைக்கான விருது ‘தாரை தப்பட்டை’ படத்துக்கு இசையமைத்த இளையராஜாவுக்குக் கிடைத்தது.
இளையராஜா பெறும் 5 வது தேசிய விருது இது. நேற்று முன்தினம் டெல்லியில் நடைபெற்ற நிகழ்ச்சியில் தேசிய விருதுகள் வழங்கப்பட்டன. இந்த விழாவில் இளையராஜா கலந்துகொள்ளவில்லை. இந்நிலையில் மத்திய தகவல் மற்றும் ஒலிபரப்புத் துறை அமைச்சகத்துக்கு இளையராஜா கடிதம் எழுதியிருக்கிறார். அக்கடிதத்தில் அவர் எழுதியதாவது: 2010 ஆம் ஆண்டு வரை இசைக்கு ஒரே விருதுதான் வழங்கப்பட்டு வந்தது. சாகர சங்கமம், சிந்து பைரவி, ருத்ரவீணா படங்களுக்கு மூன்று தேசிய விருதுகள் பெற்றிருக்கிறேன். ஆனால் 2010-க்குப் பிறகு இசைக்கான விருதை இரண்டாகப் பிரித்துவிட்டது ஏன்? இசையமைப்புக்கு ஒரே ஒரு விருது மட்டுமே வழங்கப்படவேண்டும். இயக்கம், ஒளிப்பதிவு, எடிட்டிங் ஆகியவற்றுக்கு வழங்கப்படுவது போல. படத்தின் பாடல்கள், பின்னணி இசை என இரண்டையும் கருத்தில்கொண்டே சிறந்த இசையமைப்பாளருக்கான விருது அளிக்கப்படவேண்டும். சிறந்த பின்னணி இசைக்கு மட்டும் விருது என்பது பாதி வேலைக்கு மட்டும் அங்கீகாரம் அளிப்பதாகும். இந்த நிலை மாறவேண்டும்.”
இசைஞானி அவர்களே, தாங்கள் இசைத்துறையில் மாமேதை என்பது உலகறிந்த விடயம். காவியணிந்து துறவியைப்போல் காட்சியளிக்கும் தாங்கள் விருதை மறுத்தது பெருமைக்குரிய விடயமேயன்றி சிறுமையல்ல !! ஆனால் அதற்கான காரணத்தைத்தான் ஏற்றுக்கொள்ளமுடியவில்லை, உங்கள் ஆற்றல் இசை உலகம் நன்கறியும். “படத்தின் பாடல்கள், பின்னணி இசை என இரண்டையும் கருத்தில்கொண்டே சிறந்த இசையமைப்பாளருக்கான விருது(ஒரே விருது) வழங்கப்பட வேண்டும் ” எனக்கூறியிருக்கின்றீர்கள், பாடல்களை நீங்களே உருவாக்கிப் பாடினால் அப்படிக் கோருவது நியாயமாகப்படலாம், ஆனால் இசையை மட்டும் நீங்கள் உருவாக்க பாடல்களை வேறொவர் உருவாக்கி, பிரிதொருவர் குரல்வழங்க, அவர்களுக்கும் தயாரிப்பாளர் தங்களுக்கு அளித்ததைப்போலவே படியளக்க, இப்படிக் கேட்பது நியாயமா அய்யா ? அப்படிப் பார்த்தால், இசையமைப்பாளர், பாடலாசிரியர், பாடகர் என அனைவருமே எனக்கென பணியாற்றுபவர்களே எனக்கோரி தயாரிப்பாளர் உரிமை கொண்டாடினால் நிலமை என்னவாகும் ? இன்னுமொன்று தங்களின் அருமையான பாடல்களைப் பாடி கச்சேரி நடத்தும் தமிழக இசைக்கலைஞர்களை வரவழைத்து “ராயல்டி” தொகை கேட்டதாகவும் ஒரு செய்தி வெளிவந்தது. நீங்கள் இலவசமாய் பாடல் வெளியிடவில்லையே ? தயாரிப்பாளரிடம் பணம் பெற்றுகொன்டுதானே இசையமைத்தீர்கள், அப்படியென்றால் அதன் உரிமை உங்களுக்கா அல்லது தயாரிப்பாளருக்கா ? தங்களையும் தங்கள் அபிமானிகளையும் புண்படுத்தும் நோக்கம் இதில் சிறிதுமில்லை. நன்றி
மின்னல்! அவர் அந்த அர்த்தத்தில் சொல்லவில்லை! பாடலுக்கான இசையும், பின்னணி இசைக்கும் சேர்த்து ஒரு விருது – ஏற்கனவே தரப்பட்டது போல – இப்போதும் தர வேண்டும் என்கிறார். பாடல் எழுத அவர் கவிஞர் அல்லவே!