கதிராமங்கலம் : அரசியலுக்கு வந்திருக்கும் கமலுக்கும், விரைவில் வரவிருக்கும் ரஜினிக்கும் தமிழகத்தின் இளைய தலைமுறை தோல்வியைப் பரிசளிக்கக் காத்திருக்கிறது என்று திரைப்பட இயக்குநர் கவுதமன் தெரிவித்துள்ளார்.
ஓ.என்.ஜி.சி நிறுவனத்தின் ஹைட்ரோ கார்பன் எடுக்கும் திட்டத்தை எதிர்த்து கதிராமங்கலம் கிராம மக்கள் தொடர்ந்து போராடி வருகின்றனர். அந்தப்போராட்டம் 278வது நாளாக இன்றும் தொடர்ந்து வருகிறது.
அவர்களை திரைப்பட இயக்குநர் கவுதமன் இன்று சந்தித்தார். அப்போது, தமிழகத்தில் அரசியல் சூழல் என்ன என்பதை மக்கள் நன்கு அறிந்து வைத்து இருக்கிறார்கள். இனியும் திரைப்பட நடிகர்களை நம்பி மக்கள் ஏமாறமாட்டார்கள் என்று குறிப்பிட்டார்.
மேலும், கமல், ரஜினி இருவரும் மீனவர் பிரச்னை, விவசாய பிரச்னை, தமிழர் பிரச்னை என எதற்கும் இத்தனை ஆண்டுகள் குரல் கொடுக்காமல் இருந்துவிட்டு தற்போது அரசியல் ஆதாயத்திற்காக பேசுவது நியாயமற்றது என்றும் அவர் குறிப்பிட்டார்.
இன்னொரு முறை நடிகர்களை கோட்டையில் அமரவைத்து ஏமாற தமிழக மக்கள் தயாராக இல்லை. அரசியலுக்கு வந்த கமலுக்கும், வரவிருக்கும் ரஜினிக்கும் தமிழகத்தின் இளைய தலைமுறை தோல்வியையே பரிசளிக்கும். இவர்கள் இருவரும் மோடி அரசின் ஆதரவாளர்கள் என்பது மக்களுக்கு நன்கு தெரியும் என்றும் அவர் விமர்சித்துள்ளார்.
