மூன்றாண்டு இடைவெளிக்குப் பிறகு ராமராஜன் மீண்டும் நாயகனாக நடிக்கவிருக்கிறார்.

தமிழ் சினிமா வரலாற்றில் 1980 -90 களில் பாக்ஸ் ஆபிசீல் தனக்கென ஒரு ராஜாங்கம் நடத்தியவர் நடிகர் ராமராஜன். முன்னணி நடிகர்களின் படங்களுக்கு கொஞ்சம் கூட சளைக்காமல் சவால் விட்டு கலெக்ஷனை அள்ளியது அவரது படங்கள்! இவருடைய கரகாட்டக்காரன் படம் திரையுலக சாதனைகளை யாரும் மறந்துவிட முடியாது. இவரை செல்லமாக மக்கள் நாயகன் என்றும் அழைப்பதுண்டு.

சில வருடங்களுக்கு முன் விபத்தில் சிக்கி பல நாட்கள் ஓய்வில் இருந்தார் ராமராஜன். இப்போது புதுத் தெம்புடன் மீண்டும் நடிக்க வருகிறார். வேல் பிலிம் மேக்கர்ஸ் என்ற பட நிறுவனம் சார்பாக வே.ஜெயன் தயாரிக்கும் ‘கும்பாபிஷேகம்’ என்ற படத்தில் ராமராஜன் கதாநாயகனாக நடிக்க உள்ளார். அவருக்கு ஜோடியாக நூர்யா என்ற புதுமுகம் நடிக்கிறார். புஷ்பராஜ்.K.M எழுதி இயக்க சௌந்தர்யன் இப்படத்திற்கு இசையமைக்கிறார்.

முற்றிலும் மாறுபட்ட கிராமத்து கதையம்சத்தை மையமாகக் கொண்டு படம் உருவாகிறது. கிருஷ்ணகிரி, காவேரிபட்டினம் போன்ற இடங்களில் படப்பிடிப்பு நடைபெற உள்ளது. டிசம்பர் 9 ஆம் தேதி படப்பிடிப்பு துவங்க உள்ளது. மற்ற நட்சத்திரங்கள் தேர்வு நடைபெற்றுக் கொண்டிருக்கிறது. கடைசியாக ராமராஜன் நடித்த மேதை திரைப்படம் கடந்த 2011ல் வெளியானது. எனவே, கிட்டதட்ட மூன்றாண்டு இடைவெளிக்குப் பிறகு ராமராஜன் நடிக்க வந்திருப்பது குறிப்பிடத்தக்கது.