ஷங்கர் இயக்கத்தில் மிகப் பிரம்மாண்டமாக உருவாகி வரும் ‘ஐ’ படத்திற்காக நடிகர் விக்ரம் கடுமையாக உழைத்திருக்கிறாராம். படத்தில் மிகுந்த அர்ப்பணிப்பு உணர்வுடனும், பொறுப்புடனும் விக்ரம் நடித்ததாக தயாரிப்பாளர் பாராட்டியுள்ளார்.

கடந்த இரண்டு வருடங்களுக்கும் மேலாக விக்ரம் வேறு எந்தப் படத்தையும் ஒத்துக் கொள்ளாமல் ‘ஐ’ படத்திற்காக மட்டுமே உழைத்து வருகிறார். எதைப் பற்றியும் சிறிதும் கவலை கொள்ளாமல் முழு அர்ப்பணிப்புடன் படத்தில் அவர் நடித்துக் கொடுத்துள்ளதாக பாராட்டுகிறார்கள். இதுதான் அவருடைய தனித்துவம் என்கிறார்கள்.

படத்தில் அவர் மூன்று விதமான தோற்றங்களில் நடிக்கிறார். அதில் ஒரு தோற்றத்திற்காக மட்டும் ஏறக்குறைய 12 மணி நேரம் மேக்கப் போட வேண்டுமாம். அதை அவ்வளவு பொறுமையாக ஏற்றுக் கொண்டு, அதன் பின் நடிக்க வருவாராம்.

ஒரு தோற்றத்திற்காக தன்னை 120 கிலோ எடை கொண்டவராக மாற்றியவர், பின்னர் வேறு ஒரு தோற்றத்திற்காக 60 கிலோ வரை குறைத்துக் கெண்டாராம். இந்த அளவிற்கு கடுமையாக உழைக்கும் தமிழ் நடிகர்கள், ஏன் இந்திய நடிகர்கள் யாருமே இல்லை என விக்ரமை பாராட்டித் தள்ளுகிறார்கள் படக்குழுவினர்.

மேக்கப்பும், ஸ்பெஷல் எஃபெக்ட்ஸும் படத்தின் ஹைலைட்டான விஷயங்களாம். அந்த இரண்டுமே இதுவரை தமிழ் சினிமா பார்த்திருக்காத அளவிற்கு கண்டிப்பாக இருக்கும் என்கிறார்கள். சீனாவில் மட்டும் ஒரு சண்டைக் காட்சி மற்றும் பாடல் காட்சியை ஏறக்குறைய இரண்டு மாதங்கள் படமாக்கியிருக்கிறார்கள்.

படத்தின் இறுதிக் கட்டப் பணிகள் வேகமாக நடைபெற்று வருகிறது. படத்தைப் பார்த்து ரசிகர்கள் நிச்சயம் ஆச்சயரிப்படுவார்களாம். ‘ஐ’ படம் தீபாவளிக்கு வர இருப்பதை முன்னிட்டு மற்ற நடிகர்கள் அவர்களது படங்களை தள்ளி வைக்க முடிவு செய்துவிட்டார்களாம்.

ஐ என்றால் என்ன அர்த்தம்? ரகசியம் உடைந்தது

ஆஸ்கார் பிலிம்ஸ் தயாரிப்பில் ஷங்கர் இயக்கத்தில் விக்ரம் நடிக்கும் ஐ படம் பற்றி தினம்தினம் வெளிவரும் செய்திகளால் ரசிகர்கள் அதிகபட்ச ஆச்சரியத்தில் திளைக்கக்கூடும்.

ஐ படம் குறித்த லேட்டஸ்ட் நியூஸ் என்ன தெரியுமா? இப்படத்தின் ஆடியோ வெளியீட்டு விழா வரும் செப்டம்பர் 15 ஆம் தேதி சென்னை நேரு உள்விளையாட்டு அரங்கத்தில் மிகப்பிரம்மாண்டமாக நடைபெற இருக்கிறது. அந்த விழாவில், ஹாலிவுட் நடிகர் அர்னால்ட் ஸ்வாஸ்நேகர் சிறப்பு விருந்தினராக கலந்து கொள்கிறார்.

ரஜினி, கமல் உள்ளிட்ட திரைஉலகப் பிரபலங்கள் கலந்து கொள்ளும் இந்த விழாவில் ஏ.ஆர்.ரஹ்மான் முன்னிலையில் ஐ படத்தின் ஆடியோவை அர்னால்ட் ஸ்வாஸ்நேகர் வெளியிட, கமல், ரஜினி இருவரும் பெற்றுக் கொள்கிறார்கள். இசை வெளியீட்டை முடித்த கையோடு ஐ படத்தை உலகமெங்கும் கிட்டத்தட்ட 20000 திரையரங்குகளில் வெளியிடும் முயற்சியில் ஈடுபட உள்ளனர்.

சீனாவில் மட்டும் சுமார் 15000 தியேட்டர்களில் மிகப்பெரிய அளவில் வெளியிடப்போவதாகவும் சொல்கிறார் ஐ படத்தின் தயாரிப்பாளர் ஆஸ்கார் ரவிச்சந்திரன்.

இதற்கிடையில், ஐ படத்திற்காக விக்ரம் போட்டிருக்கும் கெட்அப் பற்றிய செய்தி ஒன்று தற்போது கசிந்திருக்கிறது. அதாவது ஓநாய் மனிதராக ஒரு கெட்அப்பில் நடித்திருக்கிறார் விக்ரம்.

இந்தத் தோற்றத்திற்காக 70 கிலோ எடையிலிருந்து 120 கிலோ எடைக்கு அதிகரித்து, பின்னர் 50 கிலோவாக எடையைக் குறைத்து கடுமையாக உழைத்திருக்கிறாராம் விக்ரம். அதோடு, இப்படத்தின் வசனகர்த்தாவும் எழுத்தாளர்களுமான சுபா ஐ என்ற தலைப்பு குறித்து ஒரு ஸ்டேட்டஸ் போட்டிருக்கிறார்கள்.

ஐ என்றால் என்ன? வியப்பு, அழகு, மென்மை, நுன்மை, கோழை, தலைவன், கணவன், அரசன், ஆசான், தயாரிக்கப்பட்ட நச்சு பாஷாணம் என பல அர்த்தங்கள் உண்டு. ஷங்கர் படத்துக்கு வைக்கப்பட்ட தலைப்பு இதில் எதைக் குறிக்கிறது என்பதை விட எவற்றைக் குறிக்கிறது என்று படம் வந்ததும் அறியலாம்! என்று சஸ்பென்ஸ் வைத்து குறிப்பிட்டிருக்கிறார்கள்.

அவர் சொல்லியிருப்பதை வைத்துப் பார்க்கும் போதும், ஐ படத்தின் கதையை நாம் அறிந்த வரையிலும் தயாரிக்கப்பட்ட நச்சு பாஷாணம் என்ற அர்த்தத்திலேயே ஐ என்ற தலைப்பை வைத்திருக்கிறார் ஷங்கர்.

ஏனெனில், ஐ படத்தின் கதைப்படி கதாநாயகனான விக்ரம், வில்லனால் படு மோசமாக பழி தீர்க்கப்படுகிறான். அதாவது, விக்ரம் உடம்பில் மிக கொடிய வைரஸை ஊசி மூலம் செலுத்திவிடுகிறான் வில்லன். விக்ரம் உடம்பினுள் செலத்தப்பட்ட அந்த வைரஸ் காரணமாக விக்ரம் உடம்பு உருக்குலைந்துபோகிறது.

கூட்டிக்கழிச்சுப் பார்த்தால் நச்சு பாஷாணம்தான் சரின்னு தோணுது..!