சேலம் மாவட்டம், இளம்பிள்ளை அருகிலுள்ள இடங்கனசாலை பேரூராட்சி, மேட்டுக்காடு என்ற ஊரை சேர்ந்த கந்தசாமி, பழனியம்மாள் தம்பதியினருக்கு வெங்கடாசலம், பெருமாள், செல்வம் என மூன்று மகன்கள். இதில், வெங்கடாசலம், செல்வம் இருவரும் வியாசாயத்துடன் நெசவு தொழிலையும் செய்து வருகிறார்கள். ஆறாம் வகுப்பு வரை மட்டுமே படித்த பெருமாள் முதலில் விசாயம் செய்து  வந்துள்ளார்.

சேலம் கிச்சிப்பாளையத்தில் மருத்துவமனை நடத்தி வந்த மருத்துவர் பாலகிருஷ்ணனுடன் ஏற்பட்ட நட்பு இவரையும் மதுவுக்கு எதிரான பாதைக்கு கொண்டுவந்துள்ளது. பாலகிருஷ்ணன் கடந்த 28 ஆண்டுகளாக மதுவுக்கு எதிரான பரப்புரை செய்து வருகிறார்.

பெருமாள் தனது 16-வது வயதில், கள்ளுக்கடை ஒழிப்பு போராட்டத்தில் கலந்து கொண்டு ஐந்து நாள் சிறை சென்றாராம்.

காங்கிரஸ் கட்சியில் தீவிரமாக ஈடுபட்டிருந்த நடிகர் சசிகுமார் தனது மனைவி சசிகலாவுடன் தீவிபத்தில் பலியானதை தொடர்ந்து அவருடைய பெயரின் முதல் பாதியை தன்னுடைய பெயருடன் சேர்த்து பெருமாள் என்ற தன் பெயரை சசிபெருமாள் என்று வைத்துக்கொண்டார்.

இவரது தாத்தா அய்யாச்சாமி கவுண்டர் தங்கள் ஊருக்கு பள்ளிக்கூடம் வேண்டும் என்பதற்காக தன்னுடைய நிலத்தில் இருபது சென்ட் இடத்தை அரசுக்கு எழுதிக்கொடுத்து இவர்கள் வீட்டு முன்பாகவே ஒரு ஆரம்பப் பள்ளி அமைய காரணமாக இருந்துள்ளார்.

இப்போது, நடுநிலைப் பள்ளியாக தரம் உயர்த்தப்பட்டபோது, இவர்களின் வீட்டுக்கு போக வழியில்லாத நிலை ஏற்பட்டுள்ளது. பிறகு, அதிகாரிகளிடம் முறையிட்டு நான்கு அடி அகலத்தில் வழி மட்டும் வாங்கியுள்ளனர்.

ஆரம்பம் முதலே குடும்ப வாழ்வில் பெரிய அளவில் ஈடுபாடு இல்லாமல் இருந்துள்ளார் சசிபெருமாள். முதல் மனைவி கோவிந்தம்மாள் இரண்டு ஆண் குழந்தைகளை விட்டுவிட்டு சென்றுவிட, அதற்கு பிறகு ஜலகண்டாபுரத்தை சேர்ந்த மகிழம் என்பவரை இரண்டாவதாக திருமணம் செய்துள்ளார். இவர்களுக்கு கவிதேவி என்கிற சுதந்திரதேவி (வயது-14) என்ற ஒரு மகள் உள்ளார்.

சசி பெருமாளுக்கு சொந்தமாக இரண்டு ஏக்கர் நிலம் உள்ளது. மழையை மட்டும் நம்பியுள்ள இந்த மானாவாரி நிலத்தில் உருப்படியாக எந்த வருமானமும் இல்லை. நாட்டு வைத்தியம், அக்குபஞ்சர் வைத்தியம், ஜோதிடம் என பல தொழிலகள் தெரிந்திருந்தாலும் அதில் முழு ஈடுபாடு காட்டவில்லை. 1996ல், வெள்ளைபிள்ளையார் கோவில் என்ற இடத்தில் சுந்தந்திரதேசம் என்று ஒரு நர்சரி பள்ளியை துவங்கினார். அதையும் முறையாக நடத்தாமல் விட்டுவிட்டார்.

ஆறு ஆண்டுகளுக்கு முன்பு சித்தர் கோவிலில் இருந்து கே.ஆர். தோப்பூர் வரையிலும் உள்ள சாலையை தார் ரோடாக போடவேண்டும் என்று அதிகாரிகளிடம் கேட்டுள்ளார். அந்த சாலையின் ஒரு பகுதி மகுடஞ்சாவடி ஒன்றியத்திலும், மற்றொரு பகுதி தாரமங்கலம் ஒன்றியத்திலும் உள்ளது. இதனால், யாருமே கவனிக்காமல் மோசமான நிலையிலிருந்த அந்த சாலையை சரி செய்யவேண்டும் என்று கூறி, சித்தனூர் என்ற இடத்திலிருந்த தண்ணீர் தொட்டி மீது ஏறி நின்று தீக்குளிக்க முயற்சி செய்துள்ளார். அதன் பிறகு, அதிகாரிகள் மேற்கொண்ட முயற்சியில் அந்த சாலை தார் ரோடாக போடப்பட்டுள்ளது. அதன் பிறகு, தன்னுடைய வீட்டுக்கு முன்பாக உள்ள ஆரம்பப்பள்ளியை நடுநிலை பள்ளியாக்க பல போராட்டங்களை நடத்தி அதையும் சாதித்துள்ளார்.

சசி பெருமாள் செல்போன் டவரின் மீது அமர்ந்து போராடியதில் உயிரிழந்துவிட்ட நிலையில் அவருடைய மனைவியை சந்தித்தோம். “வீட்டைப்பத்தியே கவலைப்பட மாட்டார். ஊர் ஊரா சுத்திக்கிட்டே இருப்பார். பிராந்தி கடையை மூடனும் என்று மட்டும் சொல்லிக்கொண்டே இருப்பார். அதற்காவே அவர் உயிரையும் விட்டுள்ளார்” என்றார்.

இரண்டாவது மகன் விவேக் பக்கத்திலுள்ள இளம்பிள்ளைக்கு நெசவுக்கு சென்று வருகிறார். முதல் மகன் பக்கத்திலுள்ள மாமனார் வீட்டில் தங்கி அங்குள்ள தோட்டத்தை கவனித்து வருகிறார்.

“எங்க குடும்பமே காங்கிரஸ் குடும்பம். பெருமாள் ஆறாம் வகுப்பு மட்டுமே படித்தான். சேலத்தை சேர்ந்த பாலகிருஷ்ணன் டாக்டர் தான் அவனுக்கு வழிகாட்டி. மதுவுக்கு எதிரான போராட்டத்துக்கு அவனை கூட்டிக்கொண்டு போனது அவர்தான். மற்றபடி தன்னுடைய வீட்டை பத்தியெல்லாம் பெருமாள் கண்டுக்கமாட்டான். ஊர் ஊரா சுத்திக்கிட்டுத்தான் இருப்பான்” என்றார் பெருமாளின் அண்ணன் வெங்கடாசலம். “இந்த பிராந்தியாலே பல வூடு கெட்டுப்போச்சு.., அதுக்கு எதிரா பிரச்சாரம் பண்ணின என் தம்பி ஊடும் இப்படியாகிடுச்சு” என்றார் தம்பி செல்வம்.

சேலத்தை சேர்ந்த மருத்துவர் பாலகிருஷ்ணனை சந்திக்க சென்றோம். மூன்று மதத்தையும் குறிக்கும் வகையில், தனது பெயரை பிராங்லின் ஆஸாத் காந்தி என பெயர் மாற்றம் செய்துகொண்டு காந்தி குடில் என்ற வீட்டில் வசித்து வருகிறார். “28-ஆண்டுகளாக மதுவுக்கு எதிராக பிரச்சாரம் செய்துகொண்டு, போராடிவருகிறேன். சசி பெருமாள் என்னோடு பல போராட்டங்களில் கலந்து கொண்டுள்ளார். 2008-சென்னை காந்தி சிலைக்கு முன்பாக நடந்த உண்ணாவிரத போராட்டத்தில் கலந்து கொண்டு நான்காம் நாள் மயக்கமடைந்தார். இப்போது, தன்னுடைய உயிரை கொடுத்து மதுவை தடுக்கவேண்டும் என கூறியுள்ளார். என்னுடைய நண்பர்கள், சிகிச்சைக்கு வருபவர்கள், என்னுடைய பள்ளியில் படிக்கும் மாணவர்கள் எல்லோருமே மதுவுக்கு எதிராக போராடுபவர்களே… ஆறு, எழு, எட்டாம் வகுப்பு மாணவர்களின் பாட புத்தகத்தில் மதுவின் தீமைகளை விளக்கும் பாடத்தை சேர்க்கவேண்டும் என கடந்த நான்கு ஆண்டுகாளாக தமிழக அரசு, தலைமை செயலர், கல்வி அமைச்சர், கல்வித்துறை செயலர் என நால்வருக்கும் தொடர்ந்து மனு அனுப்பி வருகிறேன். இது குறித்து பல அதிகாரிகள் வந்து விசாரித்துவிட்டும் சென்றுள்ளனர். ஆனால், அதை இன்னும் செய்யவில்லை. மது ஒழிந்தால் மட்டுமே நம் நாட்டில் ஒரு நல்ல இளைஞர் சமுதாயத்தை உருவாக்க முடியும் என்றார்.

-பெ.சிவசுப்ரமணியம்

-http://www.nakkheeran.in