இலங்கைக்கு தாரை வார்க்கப்பட்ட கச்சதீவை மீளவும் பெற்றுக்கொள்ள பாராளுமன்றத்தின் இரு அவைகளிலும் தீர்மானம் ஒன்று நிறைவேற்றப்பட வேண்டும் என கோரிக்கை விடுக்கப்பட்டுள்ளது.
அ.தி.மு.க மக்களவை உறுப்பினர்கள் இவ்வாறு கோரிக்கை விடுத்துள்ளனர். குறித்த விடயம் தொடர்பில் கருத்து தெரிவித்துள்ள வடசென்னை தொகுதி அ.தி.மு.க உறுப்பினர் டி.ஜி.வெங்கடேஷ் பாபு,
இலங்கை கடற்படையினரால் தமிழக மீனவர்கள் தொடர்ந்தும் தாக்கப்படுகின்றனர். தமிழக மீனவர்களின் பாரம்பரிய மீன்பிடி உரிமைகளை மீறும் வகையில் இலங்கைக் கடற்படையினர் அத்துமீறலில் ஈடுபட்டு வருகின்றனர்.
கடந்த 15ம் திகதி நான்கு தமிழக மீனவர்கள் இலங்கைக் கடற்படையினரால் கைது செய்யப்பட்டுள்ளனர்.
மீனவர்களின் பிரச்னைக்குத் தீர்வு காண 1974 மற்றும் 1976ம் ஆண்டுகளில் இலங்கையுடன் செய்து கொள்ளப்பட்ட கச்சதீவு ஒப்பந்தத்தை மீளப்பெற்றுக்கொள்ள மத்திய அரசு நடவடிக்கை எடுக்க வேண்டும்.
அத்துடன், இலங்கை சிறைகளில் தடுத்து வைக்கப்பட்டுள்ள தமிழக மீனவர்களை மீட்க இந்திய வெளிவிவகார அமைச்சு நடவடிக்கை எடுக்க வேண்டும் என அவர் வலியுறுத்தியுள்ளார்.
இந்நிலையில் குறித்த விடயம் தொடர்பில் கருத்து தெரிவித்துள்ள நாமக்கல் மக்களவைத் தொகுதி அ.தி.மு.க உறுப்பினர் பி.ஆர். சுந்தரம் இவ்வாறு கூறியுள்ளார்.
இலங்கைக்கு கச்சதீவு தாரைவார்க்கப்பட்டதற்கு எதிராக உச்ச நீதிமன்றத்தில் தமிழக முதல்வர் வழக்குத் தாக்கல் செய்துள்ளார்.
பாராளுமன்றத்தின் இரு அவைகளின் ஒப்புதல் இல்லாமல் இலங்கைக்கு கச்சதீவு தாரைவார்க்கப்பட்டுள்ளது. இது சட்டப்படி செல்லுபடியற்றது.
எனவே, கச்சதீவை மீட்க பாராளுமன்றத்தின் இரு அவைகளிலும் மத்திய அரசு தீர்மானம் கொண்டு வர வேண்டும் என அவர் கோரிக்கை விடுத்துள்ளார்.
இதேவேளை, குறித்த விடயம் தொடர்பில் கருத்து தெரிவித்துள்ள இராமநாதபுரம் மக்களவைத் தொகுதி அ.தி.மு.க உறுப்பினர் ஏ.அன்வர்ராஜா,
தமிழக மீனவர்களை இலங்கைக் கடற்படையினர் தொடர்ந்து கைது செய்தும், கடலில் மீன்பிடிக்கும் மீனவர்களைத் தாக்கி துன்புறுத்தியும் வருகின்றனர்.
தமிழக மீனவர்களின் துயரத்திற்குப் பிரதான காரணமே வெளிவிவகார கொள்கையின் தவறான கையாளுகைதான்.
எனவே, தமிழக மீனவர்களின் பிரச்னைக்கு மத்திய அரசு உடனடியாகத் தீர்வு காண நடவடிக்கை எடுக்க வேண்டும் என அவர் மேலும் தெரிவித்துள்ளார்.
-http://www.tamilwin.com
1. அதிமுக மக்களவைத் தொகுதித் தலைவர் நாடாளுமன்றத்தில் இந்தக் கோரிக்கையை வைத்து என்னப் பயன்? முதலில் இந்திய அரசுக்கு எதிராக நாடாளுமன்ற அவைத் தலைவர் இந்தக் கோரிக்கையை ஏற்றுக் கொள்வாரா? இலங்கையிலிருந்து வெளிவந்த கச்சத் தீவு சம்பந்தமான இந்த அறிக்கையையும் படிக்க வேண்டும். “கச்சதீவை இந்தியா மீண்டும் பெற வேண்டுமானால் இலங்கைக்கு எதிராக போர் தொடுக்க வேண்டும். அதைவிடுத்து வேறு வழியில்லை என இலங்கை நாட்டுத் தேசப்பற்றுள்ள தேசிய இயக்கத்தின் பொதுச் செயலாளர் டாக்டர் வசந்த பண்டார தெரிவித்துள்ளார். தமிழ்நாட்டு மக்களின் உண்மையான பிரச்சினைகளை மூடிமறைக்கவே கச்சதீவை மீட்போம் என்ற விடயத்தை ஜெயலலிதா முன்வைக்கின்றார் என்றும் அவர் குறிப்பிட்டுள்ளார்”. இதன் முடிவு என்னவென்றால் தமிழகத்திற்கு சொந்தமான கச்சத் தீவை இனிமேல் எந்தக் காலத்திலும் தமிழகம் மீட்க முடியாது என்பதுதான் பொருள். மேலும் இவரின் முழு அறிக்கையையும் படிக்க வேண்டும். அப்போதுதான் உண்மை விளங்கும். 2. மேலும் கச்ச தீவை தாரைவார்க்கப்பட்டதற்கு எதிராக உச்ச நீதிமன்றத்தில் தமிழக முதல்வர் வழக்குத் தாக்கல் செய்துள்ளதையும் இவர் பேசியுள்ளார். வழக்குப் போட்டது தமிழக முதல்வரா அல்லது தமிழக அரசா? மேலும் இந்தியா மற்ற நாடுகளோடு போடுகின்ற எந்த ஒப்பந்த்தத்தையும் ரத்துச் செய்யும் அதிகாரம் உச்ச நீதிமன்றத்திற்கு உள்ளதா? அதிமுக தலைமையிலான அரசு கேட்கப் பட்ட இந்தக் கேள்விகளுக்கும் கொடுக்கப் பட்ட இந்த அறிக்கைக்கும் மக்களுக்கு பதில் சொல்லவேண்டும்.
1. தமிழக மீனவர்களின் துயரத்திற்குப் பிரதான காரணமே வெளிவிவகார கொள்கையின் தவறான கையாளுகைதான் என்று தெரிவித்துள்ள இராமநாதபுரம் மக்களவைத் தொகுதி அ.தி.மு.க உறுப்பினர் ஏ.அன்வர்ராஜா தெரிவித்துள்ளது உண்மையான செய்திதான். இவரின் மனோபலத்தைப் பாராட்ட வேண்டும். மீனவர்களின் துயரம் மட்டுமில்லை, அன்றும் இன்றும் ஈழத் தமிழர்களின் துயரங்களுக்கும் இதே வெளியுறவுக் கொள்கையை தவறான முறையிலும் கையாண்டதும் காரணம். ஆட்சியாளர்களும் மக்களால் தேர்ந்தெடுக்கப் பட்ட அரசியல்வாதிகள். ஆதலால் கச்சத் தீவு விவகாரத்தில் ஏதோவொரு அரசியல் உள்நோக்கம் இருப்பதை மறுக்க முடியாது. முதல் இந்தியப் பிரதமரான நேரு அவர்கள் நாட்டின் பாதுகாப்பைக் கருதி நல்ல நோக்கத்த்தோடு கொண்டு வந்த வெளியுறவுக் கொள்கை, வங்க தேசம் உருவாகக் காரணமாக இருந்ததும் அதேக் கொள்கையால் ஈழத் தமிழர்களின் சுதந்திர போராட்டம் நசுக்கப் பட்டதற்கும் காரணமாக இருந்திருக்கின்றது. இங்கே ஒரு நாடு எதிரி நாடாகவும், மற்றொன்று நெருங்கிய நட்பு நாடாகவும் இருந்ததுதான் இந்த எதிரும் புதிருமான கொள்கை அணுகுமுறைகள். ஒரு நாட்டை துண்டாக்கினார்கள். நீண்டக் காலமாக நீதிக் கேட்டுப் போராடி கடைசியாக ஆயுதப் போராட்டம் நடத்தியதால் துண்டாகப் போகும் நிலைக்குப் போன நாட்டைக் காப்பாற்றினார்கள். யாரிடமிருந்து நாட்டைக் காப்பாற்றினார்கள்; யாரிடம் கொடுத்தார்கள். புரியவில்லை!. இன்றும் ஈழத் தமிழர்களின் பிரச்னை தீர்ந்தப் பாடில்லை. இன்னும் அவர்களுக்குத் துயரம்தான். இதுதான் இந்திய நாட்டின் வெளியுறவுக் கொள்கை. இதுவும் பாராட்டத் பட வேண்டியாக் கொள்கை!
அட்டே புத்தி வந்துடுச்சி.தமிழ்நாட்டில் இனமான உணர்வு கொண்டவர்கள் கொஞ்சம் இருக்கிறார்கள் போலும்.
ஆகப்போவது ஒன்றுமில்லை! “நாங்கள் தான் போராடினோம்!” என்று அடுத்து தேர்தலில் பயன்படுத்திக் கொள்ளலாம்! நடிப்பிலே பிறந்தவர்களுக்கு நடிப்புச் சொல்லிக்கொடுக்க வேண்டுமா!