மும்பை,

மும்பை சர்வதேச விமான நிலையத்தில் ரூ.60 லட்சம் போதைப்பொருளுடன் மிசோரம் மாநிலத்தை சேர்ந்த டேபிள் டென்னிஸ் வீரர்  லால்ரின் புயா(வயது19) கைது செய்யப்பட்டார். லால்ரின் 2015–ம் ஆண்டு தர்மசாலாவில் நடந்த தேசிய டேபிள் டென்னிஸ் போட்டியில் சாம்பியன் பட்டம் வென்றவர் ஆவார். தற்போது டெல்லியில் தங்கி பயிற்சி பெற்று வருகிறார். இவர் மும்பை சர்வதேச விமான நிலையத்திற்கு தடைசெய்யப்பட்ட போதைப்பொருளுடன் வர உள்ளதாக போதைப்பொருள் தடுப்பு பிரிவினருக்கு தகவல் கிடைத்தது.

இதையடுத்து அவர்கள் விமானநிலையத்தில் வைத்து லால்ரின் புயாவின் பையில் சோதனை நடத்தினர்.

இந்த சோதனையின்போது அவரது பையில் 3.9 கிலோ எடையுடைய தடைசெய்யப்பட்ட போதைப்பொருள் இருந்தது. அந்த போதைப்பொருளை அதிகாரிகள் பறிமுதல் செய்தனர். பறிமுதல் செய்யப்பட்ட போதைப்பொருளின் மதிப்பு ரூ.60 லட்சம் ஆகும். இதைத்தொடர்ந்து போதைப்பொருளுடன் சிக்கிய டேபிள் டென்னிஸ் வீரரை கைது செய்து, விசாரணை நடத்தி வருகின்றனர். மேலும் டெல்லிக்கு சென்று அங்கு உள்ள அவரது அறையில் சோதனை நடத்த உள்ளனர்.

-dailythanthi.com