நடிகர் தனுஷும், இயக்குநர் வெற்றிமாறனும் இணைந்து தயாரித்திருக்கும் படம் ‘காக்கா முட்டை’.
‘பண்ணையாரும் பத்மினியும்’, ‘ரம்மி’ போன்ற படங்களில் நடித்திருக்கும் நடிகை ஐஸ்வர்யா ராஜேஷ் இப்படத்தில் ஒரு முக்கிய கேரக்டரில் நடித்திருக்கிறாராம். ஜி.வி.பிரகாஷ் இசையமைக்க எம்.மணிகண்டன் ஒளிப்பதிவு செய்து படத்தை இயக்கியிருக்கிறார். இப்படம் குழந்தைகளுக்கான படம் என்கிறார்கள். ஏழ்மையான குடும்பத்தைச் சேர்ந்த இரண்டு சிறுவர்கள் பீட்சா விளம்பரத்தைப் பார்த்து அதை ஒரு முறையாவது சாப்பிட வேண்டும் என ஆசைப்படுகிறார்கள், அவர்கள் ஆசை நிறைவேறியதா? என்பதே இப்படத்தின் கதை.
படம் சென்ற வருடமே முழுமையாக முடிவடைந்து ரிலீஸுக்கு தயாராக உள்ளது. இந்நிலையில் கடந்த இரண்டு தினங்களுக்கு முன்பு டெல்லியில் அறிவிக்கப்பட்ட 62-வது தேசிய திரைப்பட விருதுகளில் சிறந்த குழந்தைகளுக்கான படமாக, தமிழ்த் திரைப்படமான ‘காக்கா முட்டை’ தேர்வு செய்யப்பட்டுள்ளது. மேலும் அதில் நடித்த சிறுவர்கள் விக்னேஷ், ரமேஷ் ஆகியோர் சிறந்த குழந்தை நட்சத்திரத்துக்கான விருதுக்கு தேர்வாகியுள்ளனர்.
இந்தப் திரைப்படம் தேசிய விருது பெற்றதை கௌரவப்படுத்தும் விதமாக நடிகர் தனுஷ் படத்தின் கலைஞர்களுக்கு தங்க சங்கிலி பரிசளித்தார். வெற்றிமாறன் படக்குழுவினரை தனது அலுவலகத்திற்க்கு அழைத்து கேக் வெட்டி கொண்டாடினார். காக்கா முட்டையின் விநியோக உரிமையை ஃபாக்ஸ் ஸ்டார் வாங்கியுள்ளதாக கூறப்படுகிறது.
-http://www.dinamani.com
