மனித நேயம் பேசும் படங்களில் நடிக்க ஆர்வமாக இருக்கிறேன் என்று கார்த்தி கூறினார். கார்த்தி நடிப்பில் சமீபத்தில் வெளியான ‘கொம்பன்’ படம் வெற்றி பெற்றது. இந்தப் படத்தின்விழாவில் கார்த்தி பேசியதாவது: ‘பருத்திவீரன்’ ரிலீசுக்குப் பிறகு கிராமத்துக் கதையில் நடிக்காதது ஏன் என்று கேட்டார்கள். அதற்காக ‘கொம்பனை’ தேர்வு செய்தேன். படம் வெற்றி அடைந்துள்ளது சந்தோஷமாக இருக்கிறது. இப்போது ஒரு படம் பெரிய வெற்றிபெற்றால் மட்டுமே முதலீடு செய்த பணம் திரும்பி வருகிறது.

‘கொம்பன்’ பார்த்தவர்கள், ‘பருத்திவீரன்’ கார்த்தியை ஞாபகப்படுத்துவதாகச் சொன்னார்கள். அந்த சாயல் வரக்கூடாது என்று சிரமப்பட்டு படத்தை உருவாக்கினோம். குடும்ப உறவுகள் பற்றிய கதைகளுக்கு நல்ல வரவேற்பு கிடைக்கும் என்பது ‘கொம்பன்’ மூலம் மீண்டும் நிரூபிக்கப்பட்டுள்ளது. இதில் வன்முறைக் காட்சிகள் அதிகம் இருந்ததாக சொன்னார்கள். சாதாரண மக்களிடையே வாக்குவாதமும், கருத்து வேறுபாடும், சண்டையும் வந்தால் உடனே கத்தி, கம்பு, அரிவாள் தூக்குவார்கள். அதைத்தான் படத்தில் கதைக்கு ஏற்ப காட்டியிருக்கிறோம். தொடர்ந்து மனிதநேயம் உள்ள கதைகளில் நடிக்கத் திட்டமிட்டுள்ளேன். இவ்வாறு அவர் பேசினார்.

– cinema.dinakaran.com