தியேட்டரில் சூப்பர்ஸ்டார் என்ற டைட்டில் கார்டுக்கு கைதட்டத் துவங்கும் ரசிகர்கள் படம் முடியும் வரை ஓயாது கைதட்டிக்கொண்டிருப்பார்கள். ரஜினியிடம் அவர் ரசிகர்களின் எதிர்பார்ப்பு இதுதான். இதை பெரும்பாலும் காப்பாற்றிக்கொண்டு வந்த ரஜினி கடைசி சில படங்களில் கைவிட்டுவிட்டார்.

கடமையும், கொடுத்துவிட்ட வாக்கும் அவரை அந்நிலைக்கு ஆளாகியிருக்கலாம். ஆனால் அடுத்த படத்தில் எப்படியும் ரசிகர்களை திருப்திபடுத்திவிட வேண்டும் என்ற முடிவிலிருக்கும் ரஜினி ஷங்கருடன் எந்திரன் 2 திரைப்படத்தில் இணைவார் என்றே எதிர்பார்க்கப்பட்டது.

திரையுலகம், ரசிகர்கள் என அனைவரையும் ஆச்சர்யப்படுத்தும் வகையில் அடுத்த படத்தில் மெட்ராஸ் பட இயக்குனர் ரஞ்சித்துடன் ரஜினி இணைவதாக செய்திகள் வெளியாகியுள்ளன. ரஜினி தரப்பில் ‘இதற்குள் இதைப்பற்றி பேச வேண்டுமா” என்கிறார்களாம். ரஞ்சித் தரப்பிலோ தாணு தயாரிப்பு, சந்தோஷ் நாராயணன் இசை என வேலைகள் மும்மரமாக நடக்கிறது. புதிய களத்தில் சமூகக் கருத்துகொண்ட கமர்ஷியல் எண்டர்டெயினராக கதையை அமைத்திருக்கிறாராம் ரஞ்சித்.

செய்தி அறிந்த ரஜினி ரசிகர்களோ மகிழ்ச்சியின் உச்சத்தில். பிரம்மாண்டங்களை உதறிவிட்டு  தங்களது தலைவரை மீண்டும் இயல்பான கதாபாத்திரத்தில் பார்க்கவேண்டும் என காத்திருக்கிறார்கள். மூன்றாவது படத்திலேயே ரஞ்சித் ரஜினியுடன் இணைகிறாரா? என்ற அதிர்ச்சியில் இருக்கிறது கோடம்பாக்கம்.

-http://www.nakkheeran.in