திருச்சி: எதிர்க்கட்சித் தலைவராக இருக்கிறார் விஜயகாந்த். இவரது பேச்சைக் கேட்டால் பிற மாநிலத்தில் வாழும் தமிழர்களுக்கெல்லாம் எவ்வளவு கேவலம். தமிழர்களைக் கேவலமாக நினைக்க மாட்டார்களா என்று வேதனை வெளியிட்டுள்ளார் நாம் தமிழர் தலைவர் சீமான். வருகிற சட்டசபைத் தேர்தலில் தனித்துப் போட்டியிடுவதாக அறிவித்துள்ள நாம் தமிழர் கட்சி தனது வேட்பாளர்களை அறிமுகப்படுத்தி வருகிறது. அப்படி ஒரு வேட்பாளர் அறிமுகக் கூட்டம் திருச்சி, கீழப்புதூரில் நடந்தது. அப்போது கட்சி வேட்பாளர்களை அறிமுகப்படுத்தி வைத்துப் பேசினார் சீமான். அவரது பேச்சிலிருந்து….
தமிழகத்தில் காமராஜர் ஆட்சிக்காலத்தில் ஊழல் என்றால் என்னவென்று தெரியாது. தனக்கு கிடைக்காத கல்வி வருங்கால பிள்ளைகளுக்கு கிடைக்க வேண்டும் என்று ஓடி, ஓடி படிக்க வைத்தார் காமராஜர்.
ஆனால் இப்போது தமிழகத்தில் டாஸ்மாக் மூலம் கோடிக்கணக்கான ரூபாய் வருமானம் கிடைக்கிறது. அந்த வருமானம் அரசாங்கத்துக்கு போய் சேருகிறது என்றால், டாஸ்மாக் தொழிற்சாலைகள் மூலம் கிடைக்கும் வருமானம் யாருக்கு போய் சேருகிறது?. இங்கு தெருவுக்கு 4 டாஸ்மாக் கடைகள் இருக்கும்போது, 200 கார்டுகளுக்கு ஒரு ரேஷன்கடை என்று ஏன் கொண்டு வர முடியாது?.
அரசு போக்குவரத்து கழகத்தில் 40 ஆயிரம் கோடி இழப்பு என்கிறார்கள். ஆனால் அனைத்து பஸ்களிலும் மக்கள் கூட்டம் நிரம்பி வழிகிறது. படிக்கட்டுகளில் தொங்கி கொண்டு செல்கிறார்கள். அப்படி இருக்கும்போது இழப்பு எப்படி வருகிறது.
கேரளா, ஆந்திரா, கர்நாடகா போன்ற மாநிலங்களில் ஆற்றுமணலை அள்ள முடியாது. ஆனால் தமிழகத்தில் அள்ளி விற்பனை செய்கிறார்கள். இதனை கண்டித்து போராட்டம் நடத்தினால் தடியடி நடத்தி சிறை பிடிக்கிறார்கள்.
தமிழகத்தில் ஆட்சி மாற்றத்தால் எந்த பயனும் இல்லை. அடிப்படை அரசியல் மாற்றம் வேண்டும். மக்கள் பிரச்சினைகளை அரசு கையில் எடுக்காதபோது, அரசை மக்கள் கையில் எடுப்பதை தவிர வேறு வழியில்லை.
வருகிற சட்டமன்ற தேர்தலில் நாம் தமிழர் கட்சி 234 தொகுதிகளிலும் தனித்து போட்டியிடுகிறது. இதில் 50 இடங்களில் பெண்களுக்கு வாய்ப்பு அளிக்கப்பட்டுள்ளது.
சட்டமன்ற தேர்தலில் மக்கள் நல கூட்டியக்கத்துடன் இணைந்து பணியாற்ற வாய்ப்பு இல்லை. நாங்கள் தனித்து தான் போட்டியிடுகிறோம். அதிமுக. திமுக என்ற இரு கட்சிகளுடன் வைகோ மாறி, மாறி கூட்டணி வைக்காமல் இருந்து இருந்தால் நாங்கள் இந்த கட்சியை தொடங்க வேண்டிய அவசியம் இருந்து இருக்காது.
அதிமுக, திமுக இந்த இரு கட்சிகளுக்கும் இந்த தேர்தல் வாழ்வா?. சாவா?. என்ற நிலையில் இருக்கிறது. நேர்மையானவர்களே எங்கள் கட்சியின் வேட்பாளர்களாக நிறுத்தப்பட்டுள்ளார்கள்.
தமிழர்கள் ஒருவருக்கொருவர் அடித்துக் கொள்வதால் மற்றவர்கள் வாழ்கிறார்கள். அப்படித்தான் ஜெயலலிதாவும் கருணாநிதியும் விஜயகாந்தும் அரசியலில் வாழ்கிறார்கள். எதிர்க்கட்சி தலைவர் விஜயகாந்த். அவரது பேச்சை கேட்டால் மற்ற மாநிலங்களில் என்ன நினைப்பார்கள். தமிழனை கேவலமாக நினைக்க மாட்டார்களா?
நாம் தமிழர் ஆட்சி அமைந்தால் ஆடு, மாடு மேய்ப்பது அரசு வேலை, தமிழ் படித்தால் உள்ளூரில் வேலை, ஆங்கிலம் மற்றும் பிறமொழி படித்தால் வெளிநாட்டில்தான் வேலை. கல்வி, மருத்துவம் இலவசம். முதல்வர் கூட உள்ளூர் அரசு மருத்துவமனையில்தான் வைத்தியம் பார்க்கணும். தனியார் முதலாளிகளால்தான் தரமான கல்வியும், மருத்துவமும் தரமுடியும் என்றால் இந்த ஆட்சி எதுக்கு. கலைத்திட வேண்டியதுதானே?
ஜல்லிக்கட்டு காளைகளுக்கு தடை, கேட்டால் மாடு கஷ்டப்படுதாம். மாடு பிடித்து காயம்படுகின்ற நாங்களே கஷ்டப்படல. நீங்க என்ன கஷ்டப்படுவது. இந்திய ராணுவத்துல குதிரை ஓடுதே, பாலைவனத்தில் ஒட்டகம் பயன்படுத்தப்படுதே, அப்போ குதிரையும், ஒட்டகமும் சிரிச்சிக்கிட்டே போகுதா? கேரளாவில் ஓணம் பண்டிகையில் காட்டிலிருக்கும் யானைகளை வரிசையில் நிற்க வைத்து விழா எடுக்கப்படுதே. அப்போது யானை தானாக வந்து நின்று விடுகிறதா?
ஜல்லிக்கட்டுகள் உள்ளவரை சினை ஊசிகளுக்கு வேலையில்லை. காளைகளை அழிக்க வேண்டும் என்று திட்டமிட்டு, காளைகள் மேல் இரக்கப்படுவதுபோல் அத்தனையும் அடிமாடாக அனுப்ப திட்டமிட்டதன் விளைவுதான் ஜல்லிக்கட்டு தடை என்றார் சீமான்.
முன்னதாக திருச்சி மாவட்டத்தில் போட்டியிடும் சட்டசபைத் தொகுதி வேட்பாளர்களை அறிவித்தார் சீமான். அதன்படி திருச்சி கிழக்கு தொகுதி-இரா.பிரபு, மேற்கு தொகுதி- சேது.மனோகரன், திருவெறும்பூர்- சோழசூரன், ஸ்ரீரங்கம்-கமல், மணப்பாறை-அருணகிரி, மண்ணச்சநல்லூர்- மணிகண்டன், முசிறி-ஆசைதம்பி, லால்குடி- சம்பத், துறையூர்-சத்யா செல்வராஜ் ஆகியோர் போட்டியிடுகின்றனர்.
இன்னாமா அரசியல் நடத்துகின்றார்கள் தமிழ் நாட்டில்! நாம் தமிழர் கட்சி தமிழ் நாடு மொத்தமும் அதிக இடங்களில் போட்டி இடுவதை விட்டிட்டு தென் மாவட்டங்களில் உங்களது கொள்கைக்கு ஒத்த அரசு சார இயக்கங்களுடன் சேர்ந்து தேர்ந்தெடுத்த இடங்களில் போட்டி போடுங்கப்பா. திருச்சிக்கு வடக்கே போகாமல் அங்கே பாட்டாளி மக்கள் கட்சிக்கு உங்கள் அதாரவை வையுங்கள். தெற்கே பாட்டாளி மக்கள் கட்சியுடன் கை கோர்த்துப் போட்டியிடுங்கள். முதல் தேர்தலில் 5 சட்டமன்ற இடங்களை வென்றாலே நாம் தமிழர் கட்சிக்கு அது பெரிய வெற்றியே. ஆரம்பத்திலேயே அகலக்கால் வைக்காமல், உங்கள் சக்தியை ஒன்று திரட்டி வாய்ப்புள்ள சிறிய தொகுதிகளில் போட்டியிடுங்களேன்.
மற்றொரு வெற்று வேட்டு……..
தேனியின் கருத்தை நான் ஆதரிக்கறேன் …அரசியலில் வீரத்தை விட விவேகம் தான் முக்கியம் …..பண முதலைகலான அந்த திராவிட போர்வையில் இருக்கும் நரி கட்சிகளை வெல்ல நாம் தமிழர் கட்சி பலம் பத்தாது. ப ம கா வுடன் கை சேர்பதுதான் சிறந்தது. தமிழர் ஓட்டுகளை சிதறாமல் பெறமுடியும்
தமிழ் நாட்டு அரசியல் சூழ்நிலையை வைத்துச் சொன்னேன். திராவிட கட்சிகளை விட்டால் நாம் தமிழர் இயக்கம் அரசியலில் குதிப்பதற்கு கூட்டணி வேண்டும். அரசியல் கட்சி கூட்டணி இல்லாவிட்டால், தமிழ், தமிழர் சார்ந்த அரசு சார இயக்கங்களின் வட்டாரக் கூட்டணி நாம் தமிழர் கட்சிக்கு அரசியலில் பேருதவியாக இருக்கும். திருச்சிக்கு வடக்கே நீங்கள் எதிர்க்கும் தெலுங்கு வம்சாவளி மக்களின் ஒட்டு வங்கி கணிசமான அளவில் உள்ளது. அதனால் வடக்கே நாம் தமிழர் கட்சி இன்றைய சூழலில் போட்டியிடுவது விவேகமாகாது. மேலும் சாதிய அடிப்படையில் ஓட்டுப் போடுவதும் அங்கு வழக்கம். இந்த சூழ்நிலையில் நாம் தமிழர் கட்சி ஒரு தெளிவான கொள்கை மற்றும் அதனை செயல்படுத்தும் செய்முறை வழிகளை மக்களுக்கு எடுத்துரைத்து களத்தில் இறங்க வேண்டும். வெறும் இன, சாதிய துவேசம் மட்டும் ஒட்டு வங்கியை கொண்டு வராது. வட்டார மக்களுக்கு எது அணுக்கமான வாழ்வியல் பிரச்சனை என்று ஆராய்ந்து அதன் அடிப்படையில் தமிழர் உணர்வு ஊட்டி ஒட்டு கேட்டுப் பாருங்கள். இங்கேதான் அவர்களின் உணர்சிகளை தூண்டி விட முடியும். உணர்ச்சி ஓட்டுகள் ஒரு பக்கம், திராவிட கட்சி எதிர்பாளர்களின் ஒட்டு ஒரு பக்கம். ஊழல் எதிர்பாளர்களின் ஒட்டு ஒரு பக்கம், ஈழ எதிர்ப்பாளர்களின் ஒட்டு ஒரு பக்கம், காங்கிரஸ் எதிர்ப்பாளர்களின் ஒட்டு ஒரு பக்கம், ஏழைகளின் நண்பன் என்ற அனுதாப ஒட்டு ஒரு பக்கம், பெண்மணிகளின் நண்பன் என்ற ஒட்டு ஒரு பக்கம், இளையோர்களின் எதிர்கால வளர்ச்சிக்கு வழிகாட்டி என்ற ஒட்டு ஒரு பக்கம், கிறிஸ்துவ, முஸ்லிம் நண்பன் என்ற ஒட்டு ஒரு பக்கம். இப்படி பல்வகையான மக்களின் மனபோக்கை அறிந்து ஓட்டுச் சேர்ப்பது அவசியம். ஒவ்வொரு இடத்திலும் வெவ்வேறு அரசியல் யுக்தி வேண்டும். இதையெல்லாம் தாண்டி வர நாம் தமிழர் இயக்கத்திற்கு காலம் எடுக்கலாம். எப்படி இளையோரைக் கொண்டு வீட்டில் உள்ள முதியோரைக் கவருவது என்ற யுக்தியும் வேண்டும். கிராமபுரங்களுக்கு ஒரு யுக்தி புறநகர் பகுதிகளுக்கு ஒரு யுக்தி, நகர் புறங்களுக்கு ஒரு யுக்தி. இதெல்லாம் செய்ய ஒரு பெரிய திறன்மிக்க தொண்டர் படை வேண்டும். சீமானின் கவர்ச்சி மிக்க அடுக்கு மொழி பேச்சு மட்டும் ஓட்டுகளைக் குவிக்கும் என்று கனவு காணாதீர்கள். வை கோ போன்று ஒரு கட்சிக்கு ஒரு தலைவர் மட்டும் இருப்பதாக காட்டிக் கொள்ள வேண்டாம். தலைவருக்குக் கீழ் உப தலைவர்களை தேர்தலுக்கு முன் மக்களுக்கு காட்ட வேண்டும். ஊடகம் உதவியாக இருக்க வேண்டும். தமிழ் நாட்டில் தமிழர் இனப்பற்றை மட்டும் கொண்டு வெற்றி பெற முடியாது என்பதை அறிந்து களம் இறங்குங்கள்.
சீமான் புதிதாக ஒன்றும் சொல்லிவிடவில்லை. ஏற்கனவே இப்படி பேசியவர்கள் எல்லாம் மூட்டையைக்கட்டிக் கொண்டு போய்விட்டார்கள். அவர்களுக்கு இனப்பற்று இருந்தது. இனப்பற்று இல்லாதவர்கள் மற்ற கட்சிகளுடன் இணைந்துவிட்டார்கள். சீமான் எப்படிப்பட்டவர் என்பதில் இன்னும் தெளிவில்லை. இவரைப்போல நூற்றுக்கணக்கானவர்களைத் தமிழகம் கண்டுவிட்டது. அதுவும் அரசியவாதி என்றால் ஆயிரம் முறை யோசிக்க வேண்டும்!
இன பற்று மொழிப்பற்று சுய மரியாதை இல்லா தமிழ் நாட்டு ஜாதி வெறி பிடித்த தமிழர்களை பற்றி என்ன சொல்ல? தமிழ் நாட்டு தொலைகாட்சிகளை பார்த்தால் புரியும். என்ன அருமையான தமிழ் பேசுகின்றனர்? அவர்களின் பெயர்களை கேட்டால் தெரியுமே எப்படிப்பட்ட தமிழர்கள் என்று? ஆனால் குறை கூறினால் மூக்குக்கு மேல் வரும்.
தலைகில் நின்னாலும் அடுத்த cm ஜெயதான்