காஞ்சிபுரம்: காஞ்சி ஏகாம்பரநாதர் கோயிலில் 3,500 ஆண்டுகள் பழமை வாய்ந்த உற்சவர் சிலையுடன் இணைந்த பாலமுருகன் திருட்டு போனதாக தற்போது வெளியான தகவல் பக்தர்களிடையே அதிர்ச்சி ஏற்பட்டுள்ளது. இந்து அறநிலையத்துறை கட்டுப்பாட்டில் உள்ளது காஞ்சி ஏகாம்பரநாதர் கோயில். பழமை வாய்ந்த இந்த கோயிலில் உற்சவர் சிலையுடன் இணைந்திருந்த பாலமுருகன் சிலை 75 சதவீதம் தங்கத்தால் ஆனது. இந்த சிலை திருட்டு போனதாகவும், அதற்கு பதிலாக வேறொரு சிலை பயன்படுத்தப்பட்டு வருவதாகவும் புதிய தகவல் தற்போது வெளியாகியுள்ளது.

இது குறித்து பக்தர் ஒருவர் தகவல் அறியும் உரிமை சட்டத்தின் கீழ் கேட்டபோது 1993-ம் ஆண்டே முருகன் சிலை காணாமல் போனதாகவும், அதற்கு பதிலாக வேறொரு சிலை வைக்கப்பட்டுள்ளதாகவும் கோயில் நிர்வாகம் கூறியுள்ளது. நன்கொடையாளர்கள் மூலமே புதிய சிலை செய்யப்பட்டுள்ளதாகவும் நிர்வாகம் குறிப்பிட்டுள்ளது.

இதனிடையே கோயில் நிர்வாகத்தின் முறைகேடுகளை கண்டித்து வரும் 22-ம் தேதி உண்ணாவிரத போராட்டம் நடத்தப்போவதாக பக்தர்கள் கூறியுள்ளனர். பல்வேறு கோயில்களில் திருட்டு போன பழமையான கோயில் சிலைகள் சென்னை ஆழ்வார்பேட்டையில் கண்டுபிடிக்கப்பட்டுள்ளன.

இதில் ஏகாம்பரநாதர் கோயிலின் பாலமுருகன் சிலை உள்ளதா என அறநிலையத்துறை ஆய்வு செய்ய வேண்டும் என்று பக்தர்கள் கோரிக்கை விடுத்துள்ளனர். பாலமுருகன் சிலையை உற்சவர் சிலையுடன் இணைக்க நடவடிக்கை எடுக்க வேண்டும் என்றும் அவர்கள் வலியுறுத்தியுள்ளனர். 20 ஆண்டுகளுக்கு மேலாக போலியான பாலமுருகன் சிலையை வணங்கி வந்தது பக்தர்களிடையே கடும் அதிர்ச்சியை ஏற்படுத்தியுள்ளது.

-http://www.dinakaran.com