தமிழகத்தில் மீண்டும் பரபரப்பு ஏற்பட்டுள்ளது. இரட்டை இலை சின்னம் பெறுவதற்காக லஞ்சம் கொடுத்ததாக தினகரன் மீது டில்லியில் வழக்குப்பதிவு செய்யப்பட்டுள்ளது.

டிடிவி தினகரன் இரட்டை இலை சின்னத்தை தனக்கு ஒதுக்க வேண்டும் என்பதற்காக, இந்திய தேர்தல் ஆணையத்திற்கு 50 கோடி ரூபாய் லஞ்சம் கொடுக்க முயன்றுள்ளார்.

இது தொடர்பாக சுகேஷ் என்பவர் பொலிசாரால் கைது செய்யப்பட்டுள்ளார்.அவர் அளித்த வாக்குமூலத்தின் அடிப்படையில், தினகரன் மீது ஜாமீனில் வெளிவர முடியாத பிரிவுகளில் வழக்குகள் போடப்பட்டுள்ளன.

இதனால் தினகரனை விசாரணை செய்ய வேண்டும் என்பதற்காக டெல்லி பொலிசார் தமிழகம் விரைந்துள்ளனர் என தகவல்கள் வெளியாகியுள்ளன.

இந்நிலையில் தினகரன் தலைமறைவாகியுள்ளார் என்றும், அவர் தற்போது எங்கிருக்கிறார் என்று தெரியவில்லை என அதிமுக வட்டாரத்தில் இருந்து தகவல்கள் வெளியாகியுள்ளன.

தினகரின் கைத்தொலைபேசிக்கு அழைப்பு எடுத்த போதும் அது இயங்கவில்லை என்றும் தெரியவருகின்றன.

இந்நிலையில், சசிகலா தரப்பில் உள்ள அதிமுக தரப்பினர் தற்பொழுது பன்னீர் அணியோடு இணைவதற்கான வாய்ப்பு ஏற்பட்டிருப்பதாவும், இரு அணியினரும் ஒன்று சேர்ந்து இரட்டை இலைச் சின்னத்தை மீட்க ஒற்றுமையாக செயற்பட வேண்டும் என கட்சியினர் ஒருமித்த கருத்தில் இருப்பதாக தெரியவருகிறது.

இதேவேளை, பன்னீர்செல்வத்துடன், இணைந்து இவர்கள் செயற்படுவார்கள் என்னும் கருத்து இப்பொழுது வேகமாக பரவிவரும் சூழ்நிலையில், நிதி அமைச்சர் ஜெயக்குமார் ‘ஓ.பன்னீர்செல்வம், ஒற்றுமையாக செயல்படுவது குறித்து கூறிய கருத்தை வரவேற்கிறோம். கழகத்தை ஒற்றுமையாக நடத்தவே இந்த கூட்டத்தினை நடத்தினோம் என்றும் இப்பொழுது பத்திரிகையாளர் சந்திப்பின் போது குறிப்பிட்டுள்ளார்.

இதேவேளை தமிழக அரசியலில் ஏற்பட்ட மந்தநிலை தற்பொழுது மீண்டும் பரபரப்பாகி சூடுபிடித்துள்ளமை குறிப்பிடத்தக்கது.