சென்னை: மத்திய அரசு வழங்கும் செம்மொழிகளில் சிறந்து விளங்குபவர்களுக்கான ஜனாதிபதி விருதுகள் பட்டியலில் தமிழ் மொழிக்கு இடம் தராதது பெரும் கொந்தளிப்பை ஏற்படுத்தியுள்ளது.
மத்திய மனிதவள மேம்பாட்டுத்துறை அமைச்சகம் பத்திரிகைகளில் ஒரு விளம்பரத்தை வெளியிட்டுள்ளது. Presidential Awards of “Certificate of Honour” என்கிற விருதுக்கு விண்ணப்பிக்க கோருகிறது இந்த விளம்பரம்.
அதாவது செம்மொழிகளில் சிறந்து விளங்கும் 60 வயதுக்கு மேற்பட்டவர்கள் இந்த விருதுக்கு விண்ணப்பிக்கலாம். அவர்களுக்கு ரூ5 லட்சம் பரிசுத் தொகை வழங்கப்படும்.
இந்த விளம்பரத்தில், சமஸ்கிருதம், பாலி, அரபிக், பெர்சியன், செம்மொழி ஒரியா, செம்மொழி கனடா, செம்மொழி தெலுகு, செம்மொழி மலையாளம் என பட்டியலிடப்பட்டுள்ளன. ஆனால் இதில் செம்மொழி தமிழ் இடம்பெறவில்லை.
மத்திய அரசு ஆண்டுதோறும் வழங்கும் இந்த விருது தமிழுக்கு இத்தனை ஆண்டுகாலமாக புறக்கணிக்கப்பட்டே வந்துள்ளது. இதுதான் பெரும் கொந்தளிப்பை ஏற்படுத்தியுள்ளது.
