பொதுத் தேர்ச்சி சான்றிதழ் (UEC) அங்கீகாரம்: அரசாங்கம் தனது நிலைப்பாட்டைத் தெளிவாக அறிவிக்க வேண்டும் – ப.

இராமசாமி, உரிமை தலைவர்

சீன தனியார் இடைநிலைப் பள்ளிகளின்  யுனைடெட் எக்ஸாமினேஷன் சர்டிபிகேட் (UEC) அங்கீகாரத்திற்கு எதிர்ப்பு தெரிவிப்பவர்கள், இந்தப் பள்ளிகள் தேசிய கல்வி அமைப்பின் ஒரு பகுதியாக இல்லையென்பதையே காரணமாக முன்வைக்கின்றனர்.

அரசு உதவியுடன் இயங்கும் சீன ஆரம்பப் பள்ளிகளில் ஆறு ஆண்டுகள் கல்வி கற்ற பிறகு CPSS-இல் சேரும் மாணவர்கள், அங்கு இடைநிலைக் கல்வி தொடர்வதன் விளைவுகளை முன்கூட்டியே அறிந்திருக்க வேண்டும் என்பதும் வாதமாக முன்வைக்கப்படுகிறது.

சீன இடைநிலைப்பள்ளிகளில்  சேரும் மாணவர்கள் சீனர்கள் மட்டுமல்ல; மலாய், இந்தியர்களும் அங்கு கல்வி பயில்கின்றனர், அவர்களின் எண்ணிக்கை சீனர்களுடன் ஒப்பிடுகையில் குறைவாக இருக்கலாம்.

ஒரு மாணவர் CPSS என்ற சீன கல்வி முறையை முடித்து UEC தேர்வை எழுதிய பிறகு, அவர் தானாகவே நாட்டின் பொதுப் பல்கலைக்கழகங்களில் சேர்க்கப்பட வேண்டும் என்று எதிர்பார்க்க முடியாது என்பதும் கூறப்படுகிறது.

ஏனெனில், முழுமையாக அரசின் ஆரம்ப மற்றும் இடைநிலைப் பள்ளி கல்வி முறையில் பயின்ற மாணவர்களுடன் ஒப்பிடுகையில் இது நியாயமானதாக இருக்காது என்று வாதிடப்படுகிறது.

இந்தக் கருத்துகளை வலுவாக முன்வைப்பவர் கல்வியாளர் டியோ கோக் சியோங்; அவர் UEC அங்கீகாரத்திற்கு கடுமையாக எதிர்ப்பு தெரிவித்து வருகிறார்.

சமீபத்தில் அவர், தங்கள் பிள்ளைகளை CPSS-இல் சேர்க்கும் பெற்றோர்கள் “இரு உலகங்களின் சிறப்புகளையும்” ஒரே நேரத்தில் அனுபவிக்க எதிர்பார்க்க முடியாது என்று கூறினார்.

ஆனால் UEC அங்கீகாரத்திற்கு எதிர்ப்பவர்கள், CPSS பள்ளிகள் நாட்டில் சட்டபூர்வமாகவும் அரசியலமைப்புச் சட்ட அடிப்படையிலும் இயங்கி வருகின்றன என்பதை சுட்டிக்காட்டத் தவறுகின்றனர். அவை வெளிநாட்டு சூழலில் இயங்கும் அமைப்புகள் அல்ல.

CPSS பள்ளிகள் இயங்க அரசாங்கம் அனுமதி அளிப்பதன் மூலம், அவை தேசிய கல்வி அமைப்பின் பகுதியாக இல்லாவிட்டாலும், அந்த கல்வி முறையை அரசு நடைமுறையில் ஏற்றுக்கொண்டுள்ளது என்பதே உண்மை.

அதனால், UEC-ஐ அங்கீகரிக்க மறுப்பது நியாயமற்றதுடன் முரண்பாடான அணுகுமுறையாகவும் உள்ளது.

அதே நேரத்தில், பொதுப் பல்கலைக்கழகங்களில் சேர விரும்பும் UEC மாணவர்களுக்கு அரசு கடுமையான தகுதி நிபந்தனைகளை விதிக்கும் உரிமை கொண்டுள்ளது.

இந்த நிபந்தனைகள் மெட்ரிகுலேஷன், STPM மற்றும் சில சமயங்களில் SPM தகுதிகளுடன் வரும் மாணவர்களுக்கும் விதிக்கப்படும் நிபந்தனைகளிலிருந்து வேறுபட்டவை அல்ல.

சமீபத்தில், SPM-இல் தேசிய மொழி பாடத்தில் கிரெடிட் பெறுதல் மற்றும் வரலாறு பாடத்தில் தேர்ச்சி பெறுதல் என்ற நிபந்தனைகளுடன் UEC மாணவர்களுக்கு அரசு அனுமதி வழங்கத் தொடங்கியுள்ளது.

அரபு மொழியை பயிற்று மொழியாகக் கொண்ட தஹ்பிஸ் கல்வி நிறுவனங்களிலும், பிற தனியார் கல்வி நிறுவனங்களிலும் பயிலும் மாணவர்களுக்கும் இதே நிபந்தனைகள் விதிக்கப்படுகின்றன.

UEC-ஐ அங்கீகரிப்பதன் மூலம், அரசு சபா மற்றும் சரவாக் பகுதிகளில் ஏற்கனவே நடைமுறையில் இருந்த ஒன்றையே மீண்டும் செய்துள்ளது.

UEC அங்கீகாரம் தொடர்பாக இந்த இரு பகுதிகளும் தீபகற்ப மலேசியாவிலிருந்து முற்றிலும் மாறுபட்ட அணுகுமுறையைக் கொண்டுள்ளன.

மேலும் முக்கியமாக, UEC மாணவர்கள் தங்களது கல்வித் திறமையின் அடிப்படையில் வெளிநாட்டு பல்கலைக்கழகங்களில் சேர்க்கைப் பெற்றுள்ளனர்.

மலாய் தேசியவாதிகளைத் தொந்தரவு செய்யாமல் இருக்க வேண்டும் என்ற தேசியவாதக் காரணங்களால், அரசு நீண்ட காலமாக UEC அங்கீகாரத்தை தாமதப்படுத்தியது.

இப்போது வழங்கப்பட்டுள்ள அங்கீகாரம், வரவிருக்கும் தேர்தல்களை முன்னிட்டு DAP-ஐ சமாதானப்படுத்தும் அரசியல் முயற்சியா என்பது பின்னர் தெரியவரும்.

இப்போது DAP, UEC தொடர்பான இந்த புதிய அறிவிப்பை அரசியல் ரீதியாகப் பெரிதும் பயன்படுத்தும் என்பது உறுதி.

STPM, மெட்ரிகுலேஷன், UEC போன்ற அனைத்து முன் பல்கலைக்கழகத் தகுதிகளும், இடவசதி மற்றும் பிற தகுதிநிபந்தனைகளின் அடிப்படையில் பொதுப் பல்கலைக்கழகங்களில் சேர்க்கைக்கான நிபந்தனைத் தகுதிகளாகவே உள்ளன.

ஆனால் UEC மாணவர்களுக்குச் விதிக்கப்படும் நிபந்தனைகள், அந்தத் தகுதியை அங்கீகரிக்கவில்லை என்பதைக் குறிக்காது.

அரசாங்கம் இறுதியாக CPSS-இன் UEC-ஐ அங்கீகரித்துவிட்டது. ஆனால் அதனை தெளிவாகவும் பொறுப்புடனும் அறிவிக்கும் நேர்மையும் துணிவும் அரசாங்கத்திடம் இல்லை. இன்னும் சில அரசு அதிகாரிகள், UEC முழுமையாக அங்கீகரிக்கப்படவில்லை என்று கூறி வருகின்றனர்.

அரசாங்கம் UEC-ஐ நிபந்தனையுடனோ அல்லது வேறு விதமாகவோ அங்கீகரித்திருப்பதால், பிரதமர் அன்வார் அரசாங்கத்தின் அதிகாரப்பூர்வ நிலைப்பாட்டை தெளிவாகவும் உறுதியாகவும் அறிவிக்க வேண்டும்.