தமிழகத்தை உலுக்கிய தர்மபுரி மாவட்ட கலப்பு திருமணத் தம்பதியரில், கணவன் இளவரசன் ரயில் தண்டவாளத்தில் மூளை சிதறிய நிலையில் பிணமாக மீட்கப்பட்டிருக்கிறார்.

அவர் தற்கொலை செய்து கொண்டிருக்கலாம் என காவல்துறையினர் ‌கூறுகின்றனர்.

தலித் இளைஞரான இளவரசன் வன்னியர் வகுப்பைச் சேர்ந்த திவ்யாவை அவரது பெற்றொரின் விருப்பத்தை மீறித் திருமணம் செய்ய, பின்னர் திவ்யாவின் தந்தை தற்கொலை செய்துகொள்ள, அதை அடுத்து தருமபுரியில் மிகப்பெரிய வன்முறை வெடித்தது.

திவ்யாவின் தாயார் தேன்மொழி, தனது மகளை கடத்தி்ச் சென்று கட்டாய திருமணம் செய்ததாகவும், அவரை மீட்கக் கோரியும் சென்னை உயர்நீதிமன்றத்தில் வழக்கு தொடர்ந்தார்

முதலில் கணவன் குடும்பத்தினருடனேயே இருப்பதாகக் கூறிய திவ்யா, பின் ஒரு கட்டத்தில், தாயுடன் செல்வதாகக் கூறினார்.

நேற்று மீண்டும் நீதிமன்றத்தில் ஆஜராகி இளவரசனுடன் சேர்ந்து வாழ விருப்பமில்லை என கூறிவிட்டதாக திவ்யா செய்தியாளர்களிடம் தெரிவித்தார்.

கடும் மன உளைச்சலுக்குத் தான் ஆளாகியிருப்பதாகவும், தன் தந்தையின் மரணம் தன்னை மிகவும் பாதித்துவிட்ட நிலையில் இனி இளவரசனுடன் வாழும் வாய்ப்பில்லை எனவும் அவர் செய்தியாளர்களிடம் கூறினார்.

இந்நிலையில் தருமபுரி அரசு கலைக் கல்லூரியின் பின்புறம் உள்ள ரயில் தண்டவாளத்தில் இளவரசனின் உடல் கண்டெடுக்கப்பட்டது.

தற்போது அங்கே பதற்றம் நிலவினாலும், நிலை கட்டுக்குள் இருப்பதாக செய்திகள் கூறுகின்றன. -BBC