‘கோச்சடையான்’ படத்தில் மறைந்த நடிகர் நாகேஷையும் தொழில்நுட்ப உதவியுடன் நடிக்க வைத்துள்ளனராம்.

ரஜினின் இளையமகள், செளந்தர்யா ரஜினிகாந்த் அஸ்வின், ரஜினிகாந்தை வைத்து இயக்கியுள்ள படம் ‘கோச்சடையான்’. ஹாலிவுட் படம் அவதார் பாணியில், உருவாகியிருக்கும் இப்படத்தில் ரஜினிகாந்த் இரட்டை வேடத்தில் நடித்துள்ளார். ரஜினிக்கு ஜோடியாக தீபிகா படுகோனே நடித்துள்ளார். மேலும் சரத்குமார், ஆதி, நாசர், சோபனா, ருக்மணி என்று முன்னணி நட்சத்திரங்களும் நடித்துள்ளனர். இப்படத்திற்கு ஏ.ஆர்.ரஹ்மான் இசையமைத்துள்ளார்.

இதனிடையே கோச்சடையான் படத்தில் மறைந்த நடிகர் நாகேஷையும் நடிக்க வைத்துள்ளனராம். அவர், ஒரு கதாபாத்திரமாகவே வருகிறாராம். உயிரோடு இருக்கும்போதே ஒரு நடிகருக்கு நடிப்பதற்கு சான்ஸ் கிடைப்பது அரிதாக இருக்கும் இந்த காலத்தில் ஒரு நடிகருக்கு மரணத்திற்கு பின்பும் நடிக்க வாய்ப்பு கிடைத்துள்ளது. அவர்தான் நகைச்சுவை நடிகர் நாகேஷ். மோஷன் கேப்ட்சர் டெக்னாலஜியில் தயாராகி இருக்கும் கோச்சடையான் படத்தில் வேறொரு நடிகர் நடித்து அந்த நடிப்பை மட்டும் அப்படியே மோஷன் கேப்சர் செய்து நாகேஷின் பழைய படத்தில் உள்ள உருவத்தில் இணைத்து நடிக்க வைத்ததாக இயக்குனர் செளந்தர்யா தெரிவித்துள்ளார். இது கண்டிப்பாக மக்கள் மத்தியில் பெரும் வரவேற்பை பெறும் என்று அவர் நம்புகிறார்.

கோச்சடையான் இசை வெளியீட்டு விழா மார்ச் வரும் 9ம் தேதி சென்னையில் நடைபெற இருக்கிறது. இதில் கலந்து கொண்டு, இசையை வெளியிட போகிறவர், அமிதாப் பச்சன். மேலும் அன்றைய தினத்தில் வெளியிடப்படும் கோச்சடையான் டிரைலரில் நாகேஷ் நடித்த சில காட்சிகளும் இடம்பெறும் எனத் தெரிகிறது. இறந்த பிறகும் ஒருவரை புதிதாக பார்ப்பது இந்திய சினிமாவில் இதுவே முதல்முறை. நடிகர் நாகேஷ் ஏற்கனவே தில்லுமுல்லு உள்பட பல திரைப்படங்களில் ரஜினியோடு நடித்திருக்கிறார் என்பதால் அவர்கள் இருவரது நடிப்பை மீண்டும் பார்க்க ரசிகர்கள் மிகவும் ஆவலோடு இருப்பதாக கூறப்படுகிறது.