அறிமுக இயக்குநர் ஜெகதீஷின் இயக்கத்தில் நயன்தாரா, சந்தானம் ஆகியோருடன் நண்பேன்டா படத்தில் தற்போது நடித்து வருகிறார் உதயநிதி ஸ்டாலின். இந்தப்படத்தை அடுத்து, இதயம் முரளி என்ற படத்தில் நடிக்கிறார் உதயநிதி. என்றென்றும் காதல் படத்தை இயக்கிய ஏ.ஹெச்.அஹமது இப்படத்தை இயக்குகிறார்.
எண்பதுகளில் கதாநாயகனாக அறிமுகமான முரளி பல வருடங்கள் முன்னணி கதாநாயகனாக வலம் வந்தவர். முரளி என்றவுடன் அனைவருக்கும் ஞாபகம் வருவது அவர் நடிப்பில் வெளிவந்த இதயம் படத்தைத்தான். கடைசி வரை கதாநாயகி ஹீராவிடம் காதலைச் சொல்லாமலேயே ரசிகர்களிடம் பாராட்டு பெற்றார் முரளி.
இந்தப் படத்திற்குப் பிறகு முரளி என்று கூப்பிட்ட அனைவருமே அவரை இதயம் முரளி என்று அழைக்கும் அளவுக்கு, இதயம் படம் அவருக்கு மிகப்பெரிய பெயர் வாங்கிக் கொடுத்தது. இப்போது இதயம் முரளி என்பதையே உதயநிதி ஸ்டாலின் நடிக்கும் படத்திற்கு தலைப்பாக வைத்திருக்கிறார்கள்.
ஓகே ஓகே படத்தைத் தொடர்ந்து இப்படத்திலும் ஹன்சிகா ஹீரோயினாக நடிக்கிறார். முதல்முறையாக இப்படத்தில் தனது பழைய கூட்டணியை விட்டு வெளியே வருகிறார் உதயநிதி.
அதாவது காமெடிக்கு சந்தானத்திற்குப் பதில் தம்பி ராமையா நடிக்கிறார். மியூசிக் ஹாரிஸ் ஜெயராஜ் இல்லை. அனிருத். பாலசுப்பிரமணியமிற்குப் பதில் மதி ஒளிப்பதிவு செய்கிறார்.
ரெட் ஜெயன்ட் மூவீஸ் தயாரிக்கும் இப்படத்திற்கான படப்பிடிப்பு விரைவில் துவங்க உள்ளநிலையில் இதயம் முரளி என்ற டைட்டிலுக்கு அதர்வா ஆட்சேபனை தெரிவிக்கக்கூடும் என்பதால் அவரிடம் கதை சொல்லி ஓகே வாங்கி இருக்கிறார்கள்.
