இலங்கை மற்றும் இந்தியாவும் இணைந்தே ஈழத்தமிழர்களை படுகொலை செய்ததாக தென் இந்திய நடிகர் ராஜ்கிரண் தெரிவித்துள்ளார்.

அத்துடன், ஈழத்தமிழர் பிரச்சினை என்பதை ஐந்து அல்லது பத்து நிமிடங்களில் பேசி முடிக்கும் சாதாரண பிரச்சினை அல்ல எனவும், இந்த பிரச்சினையானது உலக அளவிலான பிரச்சினை எனவும் அவர் குறிப்பிட்டுள்ளார்.

சினி உலகம் ஊடகத்திற்கு அண்மையில் வழங்கிய செவ்வியிலேயே அவர் இதனை தெரிவித்துள்ளார். தொடர்ந்தும் கருத்து தெரிவித்துள்ள அவர்,

இலங்கை மற்றும் இந்தியாவும் இணைந்து ஒரு லட்சத்துக்கும் மேற்பட்ட தமிழ் மக்களை அழித்தார்கள். போராளிகள் பலரை சித்திரவதைக்கு உட்படுத்தினார்கள்.

இன்னும் பலருக்கு என்ன நடந்தது என்பது கூட தெரியாது. உலகில் எங்கும் நடக்காத கொடுமையே ஈழத்தில் நடந்தது. இந்தியாவும் இணைந்துதான் இந்த கொடூரத்தை செய்தது.

இந்தியா இறையாண்மை உள்ள நாடு என்பதை ஈழத்தமிழர்கள் விடயத்தில் காப்பாற்றப்படவில்லை. இது அமெரிக்க ஏகாதிபத்தியத்தின் ஏற்பாடு என குற்றம் சுமத்தியுள்ள அவர், இந்த விடயத்தில் நம்மால் ஆதங்கப்பட மட்டுமே முடியும் எனவும் கூறியுள்ளார்.

ஈழத்தமிழர்கள் விடயத்தில் நம்முடைய கருத்துக்களை பகிர்ந்து கொள்ளலாமே தவிர இதற்கான எந்த முயற்சியும் நம்மால் செய்ய முடியாது எனவும் அவர் குறிப்பிட்டுள்ளார்.

இந்நிலையில், ஈழத்தமிழர்கள் விடயத்தில் இறைவன் ஒருவன் தான் இதற்கு நல்ல வழி காட்ட வேண்டும். ஈழத்தமிழர்களுக்காக கட்சி ஆரம்பிப்பது, கூட்டத்தில் பேசுவது என்பது அனைத்துமே ஒரு நாடகம்.

தங்களது, கட்சியை பலப்படுத்தி கொள்வதற்காகவும், சுயலாபத்திற்காகவும், ஈழத்தமிழர்களின் பிரச்சினையை ஒரு சிலர் கையில் எடுத்துள்ளனர். அவர்களால் ஈழதமிழர்களுக்கு எவ்வித உதவியும் இருக்காது என அவர் மேலும் தெரிவித்துள்ளார்.

இதேவேளை, ஈழத்தமிழர்கள் குறித்த ராஜ்கிரணின் இந்த கருத்துக்கு, சமூக வலைத்தளங்களில் பலரும் ஆதரவு தெரிவித்துள்ளதாக இந்திய ஊடகம் ஒன்று செய்தி வெளியிட்டுள்ளது.

-tamilwin.com