அஸ்ட்ராஜெனேகா தடுப்பூசி

அஸ்ட்ராஜெனேகா தடுப்பூசி போட்டுக்கொண்ட சிலருக்கு ரத்தம் உறைதல் ஏற்பட்டதாகக் கூறி இந்த தடுப்பூசிக்கு டென்மார்க், நார்வே, ஐஸ்லாந்து போன்ற நாடுகள் தற்காலிகமாக தடை விதித்துள்ளன.

புதுடெல்லி: உலக அளவில் கொரோனாவுக்கு எதிராக பயன்படுத்தப்பட்டு வரும் தடுப்பூசிகளில் ஆக்ஸ்போர்டு – அஸ்ட்ராஜெனேகா நிறுவனங்கள் தயாரித்த தடுப்பூசி முக்கியமானது ஆகும்.

இந்த தடுப்பூசி போட்டுக்கொண்ட சிலருக்கு ரத்தம் உறைதல் ஏற்பட்டதாக கூறி இந்த தடுப்பூசிக்கு டென்மார்க், நார்வே, ஐஸ்லாந்து போன்ற நாடுகள் தற்காலிகமாக தடை விதித்துள்ளன. இதனால் பிற நாடுகளிலும் இந்த தடுப்பூசியின் பாதுகாப்பு குறித்த சந்தேகம் எழுந்துள்ளது.

இந்நிலையில், அஸ்ட்ராஜெனேகா நிறுவனம், இந்த தடுப்பூசி பாதுகாப்பு மிகுந்தது என்பது விஞ்ஞானப்பூர்வமாக நிரூபிக்கப்பட்டுள்ளது என தெரிவித்துள்ளது.

இதுதொடர்பாக அந்த நிறுவனம் நேற்று வெளியிட்டுள்ள அறிக்கையில், ‘ஐரோப்பிய ஒன்றியம் மற்றும் இங்கிலாந்தில் இந்த தடுப்பூசி போடப்பட்ட 1.7 கோடிக்கும் மேற்பட்டோரை கவனமாக பரிசோதித்ததில் நுரையீரல் அடைப்பு, ஆழமான நரம்பு பாதிப்பு உள்ளிட்ட எந்தவித பாதிப்பும் அதிக அளவில் இருந்ததற்கான ஆதாரம் இல்லை.

இந்த நாடுகளில் கடந்த 8-ம் தேதி வரை வெறும் 15 நரம்பு பாதிப்பு பிரச்சினையும், 22 நுரையீரல் அடைப்பு பிரச்சினையும் கண்டறியப்பட்டு உள்ளது. இது எதிர்பார்த்ததைவிட மிகவும் குறைவு’ என கூறியுள்ளது.

இந்தியாவில் கோவிஷீல்டு என்ற பெயரில் சீரம் நிறுவனத்தால் தயாரிக்கப்பட்டு வரும் இந்த தடுப்பூசி கடந்த ஜனவரி 16-ம் தேதி முதல் பயன்படுத்தப்பட்டு வருவது குறிப்பிடத்தக்கது.

malaimalar