வளர்ந்து வரும் நமது கலைஞர்களின் திறமைகளை வெளிப்படுத்தி அவர்களுக்கு ஊக்கமும் ஆக்கமும் அளிக்க செம்பருத்தி அமைத்துக் கொடுக்கும் கலை சார்ந்த களம் இது. இப்பகுதியில் உங்களது படைப்புகளும் இடம்பெற வேண்டுமா? இப்பொழுதே எங்களுக்கு எழுதி அனுப்புங்கள். அனுப்ப வேண்டிய மின்னஞ்சல் முகவரி : [email protected]
புள்ளல்லவே? – நீ
புழுவல்லவே? – பின்
புல்லரைக் கண்டேன் அஞ்சுகிறாய்?
கல்லல்லவே? – நீ
கசடல்லவே? – பின்
கயவரைக் கண்டேன் இஞ்சுகிறாய்?
மண்ணல்லவே? – நீ
மரமல்லவே? – பின்
மடயரை ஏன்நீ கெஞ்சுகிறாய்?
விழலல்லவே? – நீ
வெற்றல்லவே? – பின்
வீணரைக் கண்டேன் துஞ்சுகிறாய்?
கண்ணைத் திற! – கீழ்
விண்ணை அறி! – இரு
கைகளை ஏனினும் கட்டுகிறாய்?
கூட்டை உடை! – சங்கை
ஊதி எழு! – சேவல்
கூவிய பின்னுமேன் தூங்குகிறாய்?
அச்சம் அறு! – தலை
வணங்க மறு! – பழம்
ஆண்டையைக் கண்டேன் மருளுகிறாய்?
அழுகை விடு! – தாழ்
வகத்தை ஒழி! – விதிச்
சகதியில் ஏனினும் பிறழுகிறாய்?
இலக்கை அமை! – அதை
எட்ட முனை! – அதில்
இடைவரும் தடைகளைத் தாண்டவிழை!
தொடர்ந்து முயல்! – தோன்றும்
துயரம் களை! – உன்றன்
தோள்வலி நன்கு துலங்கஉழை!
விளையும் பயன்! – பகிர்வில்
வேண்டும் சமன்! – அதை
வென்றிடத் தோழமை மறுத்தல்பிழை!
ஒப்பை அழை! – மனம்
ஒன்றி உழை! – இந்த
உலகம் பொதுவென வாழ்ந்துதழை!
